Naxçıvanda ilk dəfə Peşələr Festivalı təşkil olunub
Naxçıvan, 9 noyabr, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən ölkəmizdə ikinci dəfə keçirilən Peşələr Festivalı bu il ilk dəfə olaraq Naxçıvan Muxtar Respublikasının (MR) Ordubad şəhərində baş tutub.
AZƏRTAC-ın Naxçıvan bürosu xəbər verir ki, “Peşəni peşəkardan soruş!” devizi ilə keçirilən festivalda Azərbaycan Prezidentinin Naxçıvan Muxtar Respublikasındakı səlahiyyətli nümayəndəliyindən Pənah Mehdiyev, Naxçıvan MR əmək və əhalinin sosial müdafiəsi naziri Ceyhun Cəlilov, Ordubad Rayon İcra Hakimiyyətinin başçısı Rəcəb Rəhimli, Agentliyin İdarə Heyəti sədrinin müşaviri Səftər Rəhimli, dövlət və özəl qurumların nümayəndələri, yerli ekspertlər, işəgötürənlər, tələbə və gənclər iştirak ediblər.
Festival şəhərdə böyük marağa səbəb olub, Ordubadda ilk dəfə belə bir tədbirin keçirilməsi yüksək qiymətləndirilib.
Tədbirdə Naxçıvanda sosial təminat sahəsində həyata keçirilən tədbirlər barədə məlumat verilib, gənclərin düzgün peşələrə istiqamətləndirilməsində və gələcəyin peşələri ilə tanış olmasında festivalın mühüm rolu qeyd edilib.
Daha sonra qonaqlar təqdim olunan peşələrin stendləri ilə tanış olub, peşələr üzrə ekspertlərlə söhbət ediblər.
Festival çərçivəsində robototexnika, proqram tərtibatçısı, data analitika, aşpaz, barista, aqronom, bərbər, mobil telefonların təmiri ustası, elektrik avadanlıqların təmiri, yardım masası, Uİ/UX dizayner, qrafik dizayner, geyim üzrə dizayner, fotoqraf/videoqraf peşələri üzrə peşəkar ekspertlər tərəfindən təqdimat və vörkşoplar keçirilir.
İştirakçılar peşələr üzrə hansı bacarıqların tələb olunduğunu öyrənib, müxtəlif peşələr üzrə ekspertlərin təqdimatlarında iştirak edib və peşələrlə əyani şəkildə tanış olmaq imkanı qazanıblar.
Bundan başqa, festival iştirakçılarına Agentliyin Mərkəzi Karyera filialının karyera məsləhətçiləri tərəfindən peşəyönümlü məsləhət xidmətlərinin göstərilməsi təmin edilib, onlara xidmətlər haqqında məlumat verilib.
Növbəti festival noyabrın 11-də Naxçıvan şəhərində keçiriləcək.
Bölmənin digər xəbərləri
