Naxçıvanda Vergi ödəyicilərinə xidmət mərkəzi istifadəyə verilib
Bakı, 5 may, AZƏRTAC
Ümummilli Lider Heydər Əliyevin anadan olmasının 100 illiyi ərəfəsində Naxçıvan Muxtar Respublikasının (MR) Naxçıvan şəhərində Vergi ödəyicilərinə xidmət mərkəzinin açılışı olub.
Dövlət Vergi Xidmətindən AZƏRTAC-a bildirilib ki, mərkəzin açılışı ilə əlaqədar muxtar respublikaya səfər edən Azərbaycan Respublikasının İqtisadiyyat Nazirliyi yanında Dövlət Vergi Xidmətinin rəisi Orxan Nəzərli əvvəlcə Ulu Öndər Heydər Əliyevin abidəsini ziyarət edib, abidənin önünə çiçək dəstələri düzüb. Daha sonra DVX rəisi Naxçıvan MR-də Azərbaycan Respublikası Prezidentinin səlahiyyətli nümayəndəsi Fuad Nəcəfli ilə görüşüb.
Görüşdən sonra Naxçıvan Vergi ödəyicilərinə xidmət mərkəzinin açılışı mərasimi keçirilib. Açılış mərasimində Azərbaycan Respublikasının İqtisadiyyat Nazirliyi yanında Dövlət Vergi Xidmətinin, Naxçıvan MR hökumətinin və Dövlət Vergi Xidmətinin rəhbər vəzifəli şəxsləri, sahibkarlar və ictimaiyyət nümayəndələri iştirak ediblər.
Mərkəzin açılışında çıxış edən muxtar respublikanın Baş naziri Səbuhi Məmmədov müxtəlif təyinatlı xidmət mərkəzlərinin qurulmasının vətəndaş məmnunluğunun təmin olunmasına xidmət etdiyini bildirib. Vergi ödəyicilərinə xidmət mərkəzinin yerli sahibkarların məlumatlandırılması işinə böyük töhfə verəcəyini qeyd edən Baş nazir son dövrlərdə muxtar respublikanın vergi sistemində aparılan struktur və inzibatçılıq islahatlarına toxunub. Bildirib ki, 2023-cü ildə vergi daxilolmalarında və yeni qeydə alınan sahibkarların sayında əhəmiyyətli artımlar müşahidə olunur.
İqtisadiyyat Nazirliyi yanında Dövlət Vergi Xidmətinin rəisi Orxan Nəzərli Ulu Öndər Heydər Əliyevin 100 illiyi ərəfəsində Vergi ödəyicilərinə xidmət mərkəzinin açılışının muxtar respublikanın biznes mühitində mühüm hadisə olduğunu bildirib, vergiödəyiciləri ilə vergi orqanları arasında qarşılıqlı etimadın və şəffaflığın daha da artırılmasına xidmət etdiyini vurğulayıb. Qeyd edib ki, hazırda ölkə üzrə müasir standartlara cavab verən 58 belə xidmət mərkəzi uğurla fəaliyyət göstərir. Bu mərkəzlər sahibkarlara hesabatların göndərilməsində, vergi qanunvericiliyi sahəsində maarifləndirmə prosesində, müxtəlif vergi xidmətlərinin əldə edilməsində böyük dəstək göstərir.
Naxçıvan MR Dövlət Vergi Xidmətinin rəisi Abbas İsmayılov bildirib ki, vergilərin könüllü ödənilməsi sisteminin gücləndirilməsi, sahibkarlığın inkişafı və əlverişli biznes mühitinin formalaşdırılması, vergiödəyicilərinə göstərilən xidmətlərin genişləndirilməsi və daha əlçatan olması məqsədilə Naxçıvan şəhərində ilk dəfə olaraq Vergi ödəyicilərinə xidmət mərkəzi istifadəyə verilib. Mərkəz geniş funksiyalara malik olmaqla sahibkarlara vergi sahəsi üzrə bütün xidmətləri göstərəcək.
Yeni istifadəyə verilən Vergi ödəyicilərinə xidmət mərkəzində sahibkarlara vergi uçotuna alınmaq, vergi qanunvericiliyinin tətbiqi, vergi bəyannamələrinin tərtib edilməsi və göndərilməsi, vergi ödəyiciləri ilə vergi orqanı arasında elektron sənəd mübadiləsinin aparılması və Asan İmza sertifikatlarının verilməsinə dair xidmətlər göstəriləcək. Həmçinin müraciət edənlərə büdcəyə olan borclarının öyrənmək və öz şəxsi vərəqələrinə nəzər salmaq imkanı yaradılıb. Sabit vergi ödəyən fiziki şəxslər sadələşdirilmiş vergi üzrə sabit məbləğin ödənilməsi haqqında qəbzi də xidmət mərkəzindən əldə edə biləcəklər.
Qarşıdakı dövrdə muxtar respublikada fəaliyyət göstərən vergiödəyiciləri üçün vergi xidmətlərinin əlçatanlığının artırılması və könüllü əməletmə səviyyəsinin yüksəldilməsinə nail olunması məqsədilə xidmət mərkəzləri şəbəkəsinin daha da genişləndirilməsi nəzərdə tutulur.
Sonda tədbir iştirakçıları Xidmət Mərkəzinin texniki imkanları və vergiödəyiciləri üçün yaradılan şəraitlə tanış olublar.
Bölmənin digər xəbərləri
