Naxçıvanın Boks Federasiyasının yetirməsi Tokio Olimpiadasında iştirak edəcək
Naxçıvan, 29 yanvar, AZƏRTAC
Muxtar respublikada göstərilən dövlət qayğısı sayəsində bütün sahələr kimi, bədən tərbiyəsi və idman da inkişaf etməkdədir. Ötən il Naxçıvan Muxtar Respublikası Boks Federasiyasının idmançıları 7 müxtəlif idman tədbirində iştirak edib ki, bunların arasında beynəlxalq turnir və Azərbaycan birinciliyi də var. Bu yarışlarda dəri əlcək sahibləri 2 qızıl və 1 bürünc medal əldə ediblər. İngiltərənin London şəhərində keçirilən Tokio Olimpiadasına lisenziya xarakterli yarışda isə boks məktəbinin yetirməsi Tayfur Əliyev 57 kiloqram çəki dərəcəsində vəsiqəni təmin edib.
AZƏRTAC-ın Naxçıvan bürosu xəbər verir ki, bu faktları 2020-ci ildə görülən işlər və keçirilən yarışlar barədə hesabat çıxışında federasiyanın sədr müavini Məmmədcəfər Əliyev qeyd edib.
Naxçıvan Muxtar Respublikası gənclər və idman nazirinin müavini Məcid Seyidov çıxışında vurğulayıb ki, Naxçıvan Muxtar Respublikası Ali Məclisi Sədrinin idman və idmançılara göstərdiyi diqqət və qayğısı sayəsində bu gün muxtar respublikada gənclərin idmana cəlbi, onlara sağlam həyat tərzinin aşılanması işləri diqqət mərkəzində saxlanılır. Bu işlərin davamlı həyata keçirilməsi və yaradılan müasir idman mühiti gənclərin bədən tərbiyəsi və idmana olan marağını artırır, idman klublarının və federasiyaların heyəti ilbəil genişlənir. Bütün bunların nəticəsidir ki, yeni idmançılar nəsli yetişir, müxtəlif idman növləri üzrə uğurların sayı daha da artır. Bu məqsədlə Naxçıvan Muxtar Respublikası Gənclər və İdman Nazirliyi muxtar respublika ərazisində yaradılan bütün idman federasiyaları ilə birgə fəaliyyət göstərir və bu sahədə dövlət siyasətinin tənzimləməsini həyata keçirir.
Məcid Seyidov qeyd edib ki, Naxçıvan Muxtar Respublikası Boks Federasiyası da 2020-ci ildə öz işini verilmiş tapşırıqlara əsasən qurub. Muxtar respublikada 330 idmançı 21 qrupda bu idman növü ilə məşğuldur. Gənclər və İdman Nazirliyi muxtar respublikada 2002-ci ildə yaradılan Boks Federasiyası ilə birgə idmanın bu növünü inkişaf etdirmək və kütləviliyinin təmin edilməsi məqsədilə bir sıra tədbirlər həyata keçirib.
Sonra il ərzində fərqlənən idmançılar mükafatlandırılıb.
Yığıncağa yekun vuran Gənclər və idman nazirinin müavini məşqçi-müəllimlər və idmançılar adından yaradılan şəraitə görə Ali Məclisin Sədrinə minnətdarlığını bildirib.
Bölmənin digər xəbərləri
