Neapolda Beynəlxalq Əmanətlərin Sığortalanması Assosiasiyasının konfransı keçirilib
Bakı, 28 mart, AZƏRTAC
İtaliyanın Neapol şəhərində Beynəlxalq Əmanətlərin Sığortalanması Assosiasiyasının konfransı keçirilib.
Əmanətlərin Sığortalanması Fondundan (ADIF) AZƏRTAC-a bildiriblər ki, fondun nümayəndə heyəti İtaliyanın Neapol şəhərində Beynəlxalq Əmanətlərin Sığortalanması Assosiasiyasının (IADI) Avropa Regional Komitəsinin illik toplantısı çərçivəsində “Avropada Rezolüsiya və Əmanətlərin Təminatı Sxemləri” mövzusunda keçirilən beynəlxalq konfransda iştirak edib.
IADI prezidenti, icra şurasının sədri, Yaponiya Əmanətlərin Sığortalanması Korporasiyasının direktoru Mikuniya Katsunori, Kanada Əmanətlərin Sığortalanması Korporasiyasının baş icraçı direktoru Mişel Bourque, İtaliya Əmanətlərin Sığortalanması Fondunun sədri Salvatore Makkarone, Avropa ölkələrinin banklarının ləğvetmə və sağlamlaşdırma strukturlarının nümayəndələrinin qatıldığı tədbirdə banklarda mövcud və ehtimal olunan risklər mövzusu müzakirə edilib.
Əmanətlərin Sığortalanması Fondunun icraçı direktor vəzifəsini icra edən Vüqar Abdullayev Türkiyə, Çexiya, Polşa, Qırğızıstan və digər ölkələrin nümayəndələri ilə əməkdaşlığın möhkəmlənməsi, dünya təcrübəsinin tətbiqi barədə müzakirə aparıb və son illərdə Azərbaycanda bütün sahələrdə aparılan dərin iqtisadi islahatlar, o cümlədən əmanətlərin sığortalanması sistemi və ləğv prosesində olan bankların idarə edilməsi və ləğvi barədə məlumat verib.
Bölmənin digər xəbərləri
