Nizami Gəncəvi yaradıcılığına həsr olunmuş videoçarx hazırlanıb
Bakı, 7 may, AZƏRTAC
Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin 3 nömrəli filialı “Klassik incilərimiz” layihəsində dahi şairimiz Nizami Gəncəvi həftəsinə qoşularaq onun yaradıcılığına həsr olunmuş videoçarx hazırlayıb.
İdarədən AZƏRTAC-a bildirilib ki, Azərbaycan Yazıçılar Birliyinin Xəzər bölməsinin üzvü, gənc şairə Tahirə Bərraq N.Gəncəvi irsinə müraciət edərək, onun qəzəllərindən birini səsləndirib və videoçarx kitabxananın “Instagram” və “Facebook” hesabında paylaşılıb.
Xatırladaq ki, Nizami Gəncəvi 1141-ci ildə Gəncədə dünyaya gəlib. Gəncə mədrəsələrində təhsil alıb, bir çox elmlərə (tarix, fəlsəfə, astronomiya, həndəsə) yiyələnib. Ömrü boyu Gəncədə yaşayıb. Saray şairi olmaqdan qətiyyətlə imtina edib, halal zəhməti ilə dolanıb. Dərbənd hökmdarı Seyfəddin Müzəffərin kəniz kimi hədiyyə göndərdiyi qıpçaq qızı Afaq ilə evlənib, 1174-cü ildə oğlu Məhəmməd anadan olub.
Nizami Gəncəvi yaradıcılığına lirik şeirlərlə başlayıb. Şair böyük divan yaradıb, qəzəl və qəsidələr müəllifi kimi şöhrətlənib. Lakin N.Gəncəvi dünya ədəbiyyatı tarixinə məsnəvi formasında yazdığı 5 poemadan ibarət "Xəmsə" (Beşlik) müəllifi kimi daxil olub. “Xəmsə”yə "Sirlər xəzinəsi", "Xosrov və Şirin", "Leyli və Məcnun ", "Yeddi gözəl" və "İsgəndərnamə" poemaları daxildir.
Bölmənin digər xəbərləri
