NİZAMİ PARKINDA NOBEL QARDAŞLARININ BİNALARI BƏRPA OLUNACAQ
Parkın direktoru Alfred Quliyev AZƏRTAC-ın müxbirinə demişdir ki, Lüdviq Nobelin təşəbbüsü ilə 1882-ci ildə tikilmiş “Villa petrole Nobel” adlanan bina və onun ətrafındakı tikililər əvvəlki görkəminə qaytarılacaqdır. Binanı bərpa etmək üçün eskizlər və layihə-smeta sənədləri tam hazırdır. Bu məqsədlə “Azpetrol” şirkətlər qrupu 3 milyon ABŞ dolları məbləğində vəsait ayırmışdır. Bərpa işlərinə cari ilin oktyabr ayının axırlarında başlanacaqdır. Binanın 2005-ci ilin may ayında təhvil verilməsi nəzərdə tutulmuşdur. Bakı Şəhər İcra Hakimiyyətinin başçısı H.Abutalıbovun məktubuna əsasən ərazidə bərpa işləri aparmaq məqsədi ilə park Bakı Nobel İrsi Fonduna uzunmüddətli icarəyə verilmişdir. İsveçdə yerləşən Nobel Ailəsi Cəmiyyəti, “Azpetrol” şirkətlər qrupunun, Moskva Neft və Qaz klubunun maliyyə vəsaiti hesabına Bakı Nobel İrsi Fondu bu və digər binaların bərpasını həyata keçirəcəkdir.
Bölmənin digər xəbərləri
