“O OLMASIN, BU OLSUN” FİLMİ POLŞADA NÜMAYİŞ ETDİRİLMİŞDİR

14.06.2006 [17:57]
Çap et
A⁺ A^-

Varşava İqtisadiyyat Məktəbində ölməz bəstəkar Üzeyir Hacıbəyovun “O olmasın, bu olsun” musiqili komediyası əsasında çəkilmiş eyniadlı filmin nümayişi olmuşdur.

Xarici İşlər Nazirliyinin mətbuat mərkəzindən AZƏRTAC-a verilən məlumata görə, bu, Azərbaycanın Polşadakı səfirliyinin və Varşava Universitetinin doktorantı Ş.Kazımovanın təşəbbüsü ilə baş tutmuşdur.

Varşava Universitetinin və Varşava İqtisadiyyat Məktəbinin müəllim və tələbələrinin, Polşada təhsil alan azərbaycanlıların, habelə diasporumuzun nümayəndələrinin iştirak etdikləri tədbirdə Ş.Kazımova Azərbaycan kinosunun tarixindən, Ü.Hacıbəyovun yaradıcılığından danışmışdır.

“O olmasın, bu olsun” filmi səfirliyin dəstəyi ilə DVD formatına köçürülmüş və polyak dilində altyazı ilə təqdim olunmuşdur.