OĞUZDA FAŞİZM ÜZƏRİNDƏ QƏLƏBƏNİN İLDÖNÜMÜNƏ HƏSR OLUNMUŞ TƏDBİR KEÇİRİLMİŞDİR
Mayın 9-da Oğuz şəhərində 1941-45-ci illər müharibəsində faşizm üzərində Qələbənin 63-cü ildönümünə həsr olunmuş bayram tədbiri keçirilmişdir.
Rayon icra hakimiyyətindən AZƏRTAC-ın müxbirinə bildirmişlər ki, tədbir iştirakçıları əvvəlcə 1941-45-ci illər müharibəsində həlak olanların xatirəsinə ucaldılmış abidəni ziyarət etmiş, önünə əklil qoymuş, igid həmvətənlərimizin xatirəsini ehtiramla anmışlar.
“Sənubər” şadlıq sarayında rayon rəhbərliyi və ictimaiyyət nümayəndələrinin iştirakı ilə keçirilən mərasimdə çıxış edən Oğuz Rayon İcra Hakimiyyətinin başçısı Aydın Əlihüseynov müharibə veteranlarını əlamətdar gün münasibətilə təbrik etmiş, onlara xoş arzularını bildirmişdir.
Oğuz Rayon Müharibə, Əmək və Silahlı Qüvvələr Veteranları Şurasının sədri Seyidməmməd Quliyev, müharibə veteranı Soltan Əhmədov və başqaları çıxış edərək 1941-45-ci illər müharibəsində Azərbaycanın mərd oğul və qızlarının döyüş meydanlarında göstərdikləri qəhrəmanlıqlardan danışmış, müharibə veteranlarının hüquqlarının bərpasında ümummilli lider Heydər Əliyevin xidmətlərini xüsusi vurğulamışlar. Çıxış edən müharibə veteranları onlara göstərilən diqqət və qayğıya görə Prezident İlham Əliyevə minnətdarlıqlarını bildirmiş, hər zaman onu dəstəkləyəcəklərini bəyan etmişlər.
Tədbirin sonunda veteranlara hədiyyələr təqdim olunmuşdur.
X X X
Elə həmin gün rayonun Qumlaq və Şirvanlı kəndlərinin hər birində 256 nömrə tutumu olan elektron tipli yeni ATS-lər istifadəyə verilmişdir.
Bölmənin digər xəbərləri
