OLEQ BLOXİN UKRAYNA YIĞMASININ MƏĞLUBİYYƏTİNİ RÜSVAYÇILIQ ADLANDIRMIŞDIR

14.06.2006 [23:49]
Çap et
A⁺ A^-

AZƏRTAC-ın Ukrinformdan aldığı xəbərə görə, Ukrayna yığmasının baş məşqçisi Oleq Bloxin öz ölkəsinin jurnalistlərinə müsahibəsində iyunun 14-də ukraynalıların Leypsiqdə dünya çempionatının ilk görüşündə ispanlara 0:4 hesabı ilə uduzmasını rüsvayçılıq adlandırmışdır.

Bloxin demişdir: “Biz uduzduq. Amma mənə ən çox ağır gələn odur ki, hətta müqavimət göstərmədik. Mənim oyunçularım nəyə qadir olduqlarını nümayiş etdirmədilər”.

Buna baxmayaraq, Bloxin gələcəyə nikbinliklə baxır. Onun sözlərinə görə, Ukrayna komandasının vəziyyəti düzəltməyə imkanı var. O, Səudiyyə Ərəbistanı və Tunis komandaları ilə oyunları nəzərdə tutaraq demişdir: “Bu görüşlər komandamıza layiq olduğu səviyyəyə çıxmağa kömək etməlidir. Narahat olmayın, hələ heç nə itirilməyib”.

Ukraynalılar növbəti görüşü iyunun 19-da Hamburqda Səudiyyə Ərəbistanı yığmasına qarşı keçirəcəklər.