Gəncə, 29 mart, Rauf Hacıyev, AZƏRTAC

Azərbaycan Respublikasının Prezidenti İlham Əliyevin tövsiyəsinə əsasən, şəhər və rayonların IX-XI sinif şagirdləri üçün “Ölkəmizi tanıyaq” devizi ilə keçirilən maarifləndirici tur-aksiyanın martın 26-dan 29-dək olan mərhələsi uğurla başa çatıb.

Tur-aksiya iştirakçıları səfər təəssüratlarını AZƏRTAC-ın bölgə müxbiri ilə bölüşüblər.

Abşeron rayonu, Masazır kənd 4 nömrəli tam orta məktəbin 10-cu sinif şagirdi Qəribxan Dadaşov: “Tur-aksiyaya Abşeron rayonundan qoşulmuşam. Hazırda 10-cu sinifdə oxusam da ixtisas seçimimi çoxdan etmişəm. Mən qüdrətli Azərbaycan Ordusunda hərbçi olmaq istəyirəm. Bunun üçün həm dərslərimi əla qiymətlərlə oxuyur, həm də çoxlu maraqlı tarixi-sənədli filmlərə baxıram. Oxuduğum tarix kitablarından da çıxardığım nəticə budur ki, müharibələrdə yalnız hərbi təchizatı tam olan ordular deyil, döyüşçülərinin vətənpərvərlik hissi yüksək olan ordular həmişə qalib gəlirlər. Vətəni sevmək üçün isə onun tarixindən, mədəniyyətindən xəbərdar olmaq, şəhərlərini və kəndlərini yaxından tanımaq lazımdır. Sevinirəm ki, bu cür tur-aksiyaya qoşulmuşam. Çünki, “Ölkəmizi tanıyaq” layihəsi mənə Vətənimi daha yaxından tanımağa, sevməyə, gələcəkdə peşəkar zabit olduqdan sonra isə onu qorumağıma kömək edəcək. Bu layihənin təşkilatçılarına minnətdarlığımı bildirir və tur-aksiyaların davamlı olmasını arzulayıram”.

Qəbələ şəhər 1 saylı tam orta məktəbin 10-cu sinif şagirdi Vahid Qəhrəmanov: “Tur-aksiya çərçivəsində Gəncə-Göygöl-Şəmkir marşrutu üzrə hərəkət etdik. Bu yerlərdə böyük inkişafın şahidi olduq. Tur-aksiya müddətində gördüyüm hər bir əzəmətli tikili, istər onun xarici görünüşü, istərsə də daxilində yaradılan şərait məndə və yoldaşlarımda sevinc, fərəh, qürur hissi doğurdu. İstərdim ki, bu layihə davamlı olsun və hər il minlərlə məktəbli Azərbaycanın inkişafını görüb, Vətəni ilə fəxr etsin”.

Şəki rayonu, Çeşməli kənd tam orta məktəbin 9-cu sinif şagirdi Ehtiram Yarıyev: “Tarix fənnini çox sevirəm. Bir neçə dəfə tarix üzrə intellektual yarışlarda və olimpiadalarda qalib olmuşam. Vaxtilə tarix kitablarından oxuduğum abidələri bu tur-aksiya sayəsində görə bildim. Gəncədə Nizami Gəncəvi türbəsi, İmamzadə ziyarətgahı, Şah Abbas məscidi, eləcə də Göygöl və Şəmkir şəhərlərindəki kilsələrin qarşısında çoxlu şəkil çəkdirdim. Azərbaycan multikultural ölkədir. Biz İmamzadə ziyarətgahını tərk etdikdə oradan azan səsi ucalırdı. Şəhəri gəzdikdə isə rus-provaslav kilsəsinin zəngləri çalınırdı. Şəmkir və Göygöl şəhərlərində vaxtilə almanlar tərəfindən tikilən kilsələrə də getdik. Bələdçilər bizə məlumat verdilər ki, almanlar bu şəhərləri 80 il bundan qabaq tərk ediblər. Həmin kilsələrin tarixi şəkillərinə baxdıq. Bu müddətdə hər iki kilsə olduğu kimi qorunub, saxlanılıb. Hazırda hətta Şəmkirdəki alman kilsəsində arqan alətində ifa etmək və xristianlığın lüteran məzhəbinə uyğun ayinlər icra etmək mümkündür. Bütün bunlar onu göstərir ki, vaxtilə ölkəmizdə yaşamış xalqların tarixinə və onların yaratdığı irsə hörmətlə yanaşılır”.

Qəbələ rayon, Soltannuxa kənd tam orta məktəbin 10-cu sinif şagirdi Nərmin Ağasıyeva: “Vaxtilə Ümummilli Liderimiz deyib ki, məqsədimiz təkcə Azərbaycanın paytaxtını deyil, hər bir şəhəri, qəsəbəni inkişaf etdirməkdir. “Ölkəmizi tanıyaq” layihəsinə Qəbələ şəhərindən qoşulmuşam. Tur-aksiya çərçivəsində Gəncə, Göygöl və Şəmkirin gəzməli, görməli yerləri ilə yaxından tanış olduq. Gəncənin tikililəri əzəmətli, muzeyləri zəngin, parkları genişdir. Göygöl şəhəri öz memarlığına görə filmlərdən izlədiyimiz Avropa şəhərlərinə oxşayır. Bu şəhərin küçələri geniş, yolları çox təmizdir. Göygölün bayraq meydanı şəhərin ən hündür yerində təbii təpə üzərində salınıb. Təpənin içərisində bayraq muzeyi, üzərində isə bayraq meydanı var. Muzeyə kənardan baxdıqda Azərbaycan xəritəsinə oxşayır. Heydər Əliyev Mərkəzi isə Gəncəçayın sahilində hündürlükdə inşa edilib. Bu mərkəzin ətrafından hər yana gözəl mənzərə açılır. Şəmkir şəhərinin isə Heydər Əliyev Mərkəzi, onun ətrafında salınmış geniş park, digər müasir tikililər olan Bayraq muzeyi və meydanı, eləcə də “Zəka” Gənclər Mərkəzi bənzərsizdir. Bir sözlə, indi Vətənimizin hər bir guşəsi inkişaf edib, gülüstana çevrilib”.

İmişli rayonu, Şahin Məmmədov adına 3 saylı tam orta məktəbin 9-cu sinif şagirdi Esmira Babaşlı: “Ölkəmizi tanıyaq” tur-aksiyası çərçivəsində Gəncə-Göygöl-Şəmkir marşrutu üzrə hərəkət etdik. Göygöl və onun ətrafındakı meşələr, Kəpəz dağının qarlı zirvəsi füsunkar gözəlliyə malikdir. Bələdçilər bizə məlumat verdilər ki, ilin bütün fəsillərində, xüsusən də yayda Göygölə dünyanın hər yanından turist gəlir. Göygöl Dövlət Qoruğu doğrudan da təbiətin möcüzəsidir. Maarifləndirici tur-aksiya həm də bizə imkan verdi ki, ölkəmizin tarixi yerlərini gəzək, Vətənimizi daha yaxşı tanıyaq. Tarix ərzində mövcud olan Azərbaycan dövlətlərinin, eləcə də Xalq Cümhuriyyətinin ilk paytaxtı Gəncə şəhərinin tarixi-memarlıq abidələri ilə tanış olduq. Bu məkanların hər biri biz şagirdlərin tanımalı olduğumuz yerlərdir. Bu bölgədəki bir çox abidələr, muzeylərdəki qədim eksponatlar barədə yalnız tarix kitablarından oxuyub, televiziya ekranlarından izləmişdik. İndi isə bütün bunları canlı gördük. Gəncə, Göygöl və Şəmkirin tarixi irsi qorunmaqla yanaşı, müasirliyinə də önəm verilir. Bu şəhərlərdə yenilik, müasirlik və dəyişiklikləri gördük. Həqiqətən də bütün şəhər və rayonlarımız çox sürətlə inkişaf edir”.

Oğuz rayonu, Dəymədərə kənd tam orta məktəbin 9-cu sinif şagirdi Rəşid Vəliyev: “Ölkəmizi tanıyaq” layihəsi çərçivəsində Azərbaycanın nə qədər gözəl təbiətə və zəngin mədəniyyətə sahib olduğunu bir daha gördük. Gəncəyə gələrkən biz şəhərin girişində dahi Azərbaycan şairi Nizami Gəncəvinin “Xəmsə”sinə həsr olunan kitab formalı 5 heykəlin yanından keçdik. Yaxınlıqda isə böyük filosofun qırmızı qranitdən ucaldılan möhtəşəm məqbərəsi və onun qarşısında yeni tikilən muzeyi görünürdü. Geniş düzənlikdən sonra qarşımızda açılan bu mənzərə mənə xoş təsir bağışladı. Burada yaradılan hər şey insana elmin və təhsilin ucalığını, mütaliənin isə faydalarını xatırladırdı. Bu, həm gəncəlilərin dahi şairə və onun hikmət xəzinəsinə - “Xəmsə”yə verdikləri dəyər, həm də bizim Gəncə şəhəri haqqında ilk təəssüratımız idi. İki gün ərzində biz Gəncə şəhərinin tarixi və müasir tikililəri ilə tanış olduq. Şəhərin istər qırmızı kərpicli tarixi tikililəri, istərsə də müasir binaları olduqca gözəldir. Gəncənin tarix boyu çoxsaylı qanlı vuruşların meydanı olduğunu və bu müharibələrdən nə qədər ziyan çəkdiyini öyrənmişdim. Amma burada müasir binalarla yanaşı, qədim abidələri də görəndə çox sevindim. Fikirləşdim ki, ulu babalarımız xalqımızın yaratdığı zəngin maddi-mədəni irsin gələcək nəsillərə çatdırılması üçün böyük qəhrəmanlıqlar göstərib, bu torpaq uğrunda canlarından keçiblər. Ona görə də tariximizə hörmət və ehtiram, eyni zamanda, onu qorumaq biz gənclərin Vətən qarşısında ən müqəddəs borcudur”.

Füzuli rayonu, Arazzərgər kənd tam orta məktəbin 9-cu sinif şagirdi Gülər Xəlilova: “Belə layihələr ölkəmizi yaxından tanımaq, tarixini öyrənmək, təbiəti, gəzməli-görməli yerləri ilə tanış olmaq üçün çox yaxşı fürsətdir. Biz Göygöl dolaylarından qalxarkən qarşıdakı yol iki istiqamətə ayrılırdı. Sağ tərəfdəki yolun kənarında lövhənin üzərinə “Kəlbəcər 80” yazılmışdı. Deməli, bu gün işğal altında olan Kəlbəcər bizdən çox da uzaq məsafədə deyil. Tur-aksiyada iştirak edən yoldaşlarımın bir çoxu 11-ci sinif şagirdləridir. Ona görə də bu tur-aksiya onlar üçün sonuncudur. Mən isə 9-cu sinifdə oxuyuram və gələcəkdə bir daha “Ölkəmizi tanıyaq” layihəsində iştirak etmək istərdim. Gələcəkdə bu layihəyə qoşulsam arzum budur ki, Kəlbəcər-Laçın-Şuşa marşrutu üzrə hərəkət edək”.

İsmayıllı rayonu, Uşan kənd tam orta məktəbin 10-cu sinif şagirdi Səidə Müştaqova: “Tur-aksiya çərçivəsində Gəncə, Göygöl və Şəmkir şəhərlərinin bir-birindən gözəl məkanlarını gəzdik. Ən çox diqqətimi çəkən isə Gəncə Miniatür Kitab Muzeyində nümayiş olunan kitablar oldu. İlk dəfə olaraq 17-ci əsrdə yazılmış, cəmi 2 santimetr olan Quran kitabı gördüm. Bələdçi bizə məlumat verdi ki, bu kitab həcminə görə Qafqazda mövcud olan ən kiçik Quran olduğuna görə onu Ginnesin rekordlar kitabına daxil ediblər. Biz bu muzeydə adı Ginnesin rekordlar kitabına daxil edilən hətta 1 millimetrlik kitabın da şəklini gördük. Ümumiyyətlə, üç gün ərzində Gəncə, Göygöl və Şəmkir şəhərlərində gördüklərimiz bölgə haqqında təəssüratlarımızı ikiqat artırıb. Geri qayıdandan sonra səfər təəssüratlarımı sinif yoldaşlarımla bölüşəcəyəm”.