OMBUDSMAN SUMQAYITDA MƏCBURİ KÖÇKÜNLƏRLƏ GÖRÜŞMÜŞDÜR
Qubadlı rayon icra hakimiyyətinin başçisi Malik İsaqov tədbiri açaraq, insan hüquqları üzrə müvəkkili görüş iştirakçılarına təqdim etmiş, yarandığı qısa müddət ərzində Ombudsman təsisatının fəaliyyəti barədə məlumat vermişdir.
Məcburi köçkünlər tərəfindən səmimi qarşılanan E.Süleymanova yurd yerlərini itirmiş soydaşlarımızı salamlamış, onların məişət şəraiti, yaşayış tərzi, ehtiyacları və problemləri ilə maraqlanmışdır.
Görüş zamanı məcburi köçkünlər üzləşdiyi çətinliklərdən söz açmışlar. Qaçqın və köçkün ailələrinə dəyən ziyanla əlaqədar ayrılmış kompensasiyaların gecikdirilməməsini xahiş etmişlər. Məcburi köçkünlər üçün güzəştli kreditlər ayrılmasını təklif etmişlər. Bununla bağlı Milli Məclisdə məsələ qaldırılmasının vacibliyini vurğulamışlar. Qeyd etmişlər ki, əhalinin əmanət kassalarına qoyduğu vəsaitin bərpasının zəruriliyi ilə əlaqədar Respublika Maliyyə Nazirliyi qarşısında məsələ qaldırılmalıdır.
Ombudsman ölkəmizdəki qaçqın və məcburi köçkünlərin yaşayış şəraitinin yaxşılaşdırılması üçün görülən mühüm tədbirlərdən söz açmış, bu qəbildən olan soydaşlarımızın problemlərinin həlli ilə bağlı fəaliyyətin gələcəkdə də davam etdiriləcəyini bildirmişdir.
Bölmənin digər xəbərləri
