ONUN İDEYALARI YAŞAYACAQ, ARZULARI ÇİÇƏKLƏNƏCƏKDİR
Prezident Heydər Əliyevin vəfatı “Səttarxan adına maşınqayırma zavodu” törəmə açıq səhmdar cəmiyyətinin kollektivini də sarsıtmışdır.
Səhmdar Cəmiyyəti idarə heyəti sədrinin müavini, zavodun baş mühəndisi Nadir Əsədov kollektivin kədərini AZƏRTAC-ın müxbirinə belə ifadə etmişdir:
- Azərbaycanın qurucusu və onun ən yeni tarixində özünün xüsusi yeri olan əzizimiz möhtərəm Heydər Əliyevin vəfatı xəbəri bütün xalqımız kimi, kollektivimizin də dərin kədərinə səbəb olmuşdur. Səttarxançılar respublikanın neft maşınqayırmasına verdikləri bütün töhfələri həmişə onun adı ilə bağlayıblar. Çünki 70-ci illərdə zavodun sahə üzrə flaqmana çevrilməsi Prezident Heydər Əliyevin yaxından qayğısı nəticəsində mümkün olmuşdu. Onun Moskvaya yüksək vəzifəyə getməsi ilə müəssisəmizdə bəzi işlər yaramçıq qalmışdı. 1993-cü ildə xalqın təkidli tələbi ilə yenidən hakimiyyətə qayıdandan sonra bir neçə dəfə zavodumuzda oldu, problemlərimizlə maraqlandı, qiymətli tövsiyələrini verdi. Artıq yarımçıq işləri başa çatdırılmışdır.
Dekabrın 13-də kollektivimizin matəm mitinqi keçirilmişdir. Çıxış edənlər xalqımızın böyük oğlunun dövlətçiliyimizin möhkəmləndirilməsi sahəsində xidmətlərini minnətdarlıqla xatırlatmışlar. Bildirmişlər ki, bu itki bizi Heydər Əliyev siyasi yolunu davam etdirən cənab İlham Əliyevin ətrafında daha sıx birləşdirəcəkdir. Hörmətli Prezidentimizə göndərdiyimiz başsağlığı teleqramında xüsusi vurğulamışıq ki, Heydər Əliyevin ideyalarının, arzularının həyata keçirilməsində ona arxa olacağıq.
Kədərimizə yapon dostlarımız da şərik olmuşlar. Onlar matəm lenti və tər qərənfillərlə bəzədilmiş Heydər Əliyev guşəsində qoyulmuş matəm kitabına hüznlü ürək sözlərini yazmışlar.
Bölmənin digər xəbərləri
