OPEC yeni dövlətlərin təşkilata üzvlüyünə açıqdır
Bakı, 14 iyul, AZƏRTAC
Neft İxrac Edən Ölkələr Təşkilatı (OPEC) üzvlük meyarlarına və məqsədlərinə cavab verən istənilən ölkənin təşkilata qoşulmasına açıqdır.
AZƏRTAC xəbər verir ki, təşkilatın Baş katibi Haysam əl-Qays bu barədə Vyanada keçirilən 9-cu Beynəlxalq OPEC Seminarı çərçivəsində jurnalistlərə açıqlamasında deyib.
“OPEC hər zaman yeni üzvlərin təşkilata qoşulmasına açıq olub. Üzv olmaq istəyən ölkələr OPEC-in meyarlarına uyğun gəlməli və digər iştirakçılarla ortaq məqsədlərə malik olmalıdırlar”, – deyə Haysam əl-Qays bildirib.
Onun sözlərinə görə, hazırda təşkilat bir sıra ölkələrlə danışıqlar aparır: “Mən Afrikanın bir neçə ölkəsi, o cümlədən Seneqal ilə görüşlər keçirmişəm. Namibiyanın gələcəkdə təşkilata qoşulması üçün ciddi potensialı var. Lakin bu mərhələdə yeni üzvlərin qəbulu ilə bağlı hər hansı bir qərar yoxdur”.
Əl-Qays, həmçinin yaxın zamanda Braziliyanın OPEC+ əməkdaşlıq xartiyasına qoşulduğunu xatırladıb. “Braziliyanın növbəti mərhələyə keçmək istəyib-istəmədiyini soruşmaq lazımdır. Biz onları tərəfdaş kimi qəbul edirik, lakin ölkənin bu öhdəlikləri üzərinə götürməyə hazır olub-olmadığını bilmirik”, – deyə OPEC-in Baş katibi əlavə edib.
Hazırda OPEC-ə neft ixrac edən 12 ölkə daxildir. Təşkilatın tərkibində son dəyişiklik 2023-cü ilin dekabrında baş verib – həmin vaxt Anqola təşkilatdan çıxmaq qərarına gəlib.
Bölmənin digər xəbərləri
