Bakı, 11 avqust, AZƏRTAC

Azərbaycan real geosiyasi vəziyyətə kifayət qədər optimal yanaşır və ölkəmiz dünyada yeni geosiyasi reallıqları formalaşdıran dövlətlərdən biridir. Yəni Azərbaycan müstəqil dövlət olaraq özünün ərazi bütövlüyü, dövləti və milli maraqlarının təmin olunması istiqamətində kifayət qədər ciddi addımlar atır. Bütün bunlar dövlətimizin başçısının reallıqları düzgün qiymətləndirərək atdığı addımlar nəticəsində mümkün olur.

Bunu AZƏRTAC-a açıqlamasında hərbi ekspert, əməkdar jurnalist, ehtiyatda olan polkovnik-leytenant İbrahim Rüstəmli deyib.

O qeyd edib ki, dövlətimizin başçısı hələ Prezident seçkiləri zamanı Azərbaycanda ən prioritet məsələnin ordu quruculuğu olduğunu söyləmişdi: “Ümumiyyətlə bu məsələ ölkəmizin milli maraqlarının təminatçısıdır. Dövlətimizin başçısının dediyi kimi Azərbaycanın hərbi infrastrukturu, Silahlı Qüvvələrin müdafiə qabiliyyəti, dövlət büdcəsindən ordumuzun inkişafı naminə ayrılmış vəsait dəfələrlə artırıldı. Məhz bütün bunlar Vətən müharibəsində Qələbənin təmin olunması istiqamətində görülən işlər idi. Prezident İlham Əliyevin uzaqgörən siyasəti nəticəsində Azərbaycan 44 gün ərzində ərazi bütövlüyünü bərpa etdi. Hazırda isə Zəngəzur dəhlizi ilə kimi çox ciddi prioritet məsələdə prinsipial mövqedən çıxış edir. Həmin proseslər Azərbaycanın Konstitusiyası və beynəlxalq hüququn müvafiq şərtlərinə uyğun olaraq aparılır. Hazırda Azərbaycanın Qarabağ məsələsi ilə bağlı mövqeyi Cənubi Qafqazda maraqları toqquşan dövlətləri ciddi narahat edir. Lakin bütün dünya Azərbaycanın ərazi bütövlüyünü tanıyıb və ölkəmiz beynəlxalq hüquq çərçivəsində hərəkət edir”.

Hərbi ekspert Qarabağda rusiyalı sülhməramlıların bölgədə apardığı siyasətdən Azərbaycanın məmnun olmadığını vurğulayıb: “Hazırda “humanitar yardım” adı altında Xankəndinə daşınan karvanların Laçın sərhəd-buraxılış məntəqəsində yoxlanılması Ermənistan tərəfindən dünya ictimaiyyətinə çox yanlış şəkildə nümayiş etdirilir. Bu bölgədəki rusiyalı sülhməramlılar isə ermənilərin humanitar yardımdan sui-istifadə etməsinə göz yumurlar. Eyni zamanda, Xankəndi ölkəmizin ərazisidir və orada yaşayan ermənilər Azərbaycan qanunlarına tabe olmalı, ölkə vətəndaşlığını qəbul etməlidirlər.

Prezident İlham Əliyev çıxışında həmin bölgədə yaşayan və qeyri-qanuni yolla silahlanan dəstələrin tərki-silah olduğu halda onlara amnistiya aktının tətbiq oluna biləciyini demişdi. Əlbəttə, bu, çox prinsipial və əhəmiyyətli çağırış idi. Sıravi erməni vətəndaşları həmin çağırışlara müsbət reaksiya verməlidirlər”.

Ehtiyatda olan polkovnik-leytenantın sözlərinə görə, humanitar fəlakət məsələsi ilə bağlı yaradılmış tamaşaya münasibətdə Prezident İlham Əliyev çox sərfəli və dörd dəfə daha qısa marşrut təklif edib. Bu isə Ağdam-Əsgəran yolu ilə ərzağın çatdırılması məsələsidir. Azərbaycan ərazisində yaşayan azsaylı erməni xalqına digər dövlətdən “humanitar yardım” göstərilməsi məsələsinin məqbul olmaması dəfələrlə bəyan edilib. Qarabağ məsələsində yarana biləcək hər hansı problemin həlli istiqamətində Azərbaycanın digər dövlətlərin köməyinə ehtiyacı yoxdur. Həmin bölgədə yaşayan əhalinin problemi ölkəmizin daxili işidir və məsələni özü həll etməyə qadirdir. Bütün bunlar Azərbaycana qarşı yönəlik təxribat xarakterli addımlardır.

“Həmçinin Dövlət Sərhəd Xidmətinin (DSX) Sərhəd Qoşunlarının “Qazax” Əlahiddə Sərhəd Diviziyasının qarnizon kompleksində yaradılan yeni şərait, eyni zamanda, işğaldan azad olunan ərazilərdə aparılan yenidənqurma işləri dünyaya mesaj xarakteri daşıyır. Bu həmin ərazidə təxribat törətmək istəyən revanşist güclərin heç bir nəticəyə nail olmayacağından xəbər verir. Ümumiyyətlə, Azərbaycan Qarabağ probleminin sülh yolu ilə həllinin tərəfdarıdır. Lakin sülh çağırışlarına Ermənistan tərəfi əhəmiyyət vermir. Hazırda ölkəmiz BMT başda olmaqla dünya birliyinin yerinə yetirməli olduğu siyasi missiyanı təkbaşına həyata keçirir. Ordumuzun döyüş qabiliyyətinin artırılması, hərbi sektorun müasir tələblərə cavab verən silahlarla təminatı Azərbaycanın bölgədəki sülh və əmin-amanlığı qorumaq siyasətinin təcəssümüdür”, - deyə ekspert söyləyib.