İQTİSADİYYAT
Ötən il “Iteca Caspian” və “Сaspian Event Organisers” 22 sərgi təşkil edib
Bakı, 24 yanvar, AZƏRTAC
2018-ci ildə “Iteca Caspian” və “Сaspian Event Organisers” (CEO) sərgi şirkətləri Azərbaycanda 22 sərgi, bir konfrans və bir forum təşkil edib.
Şirkətdən AZƏRTAC-a bildirilib ki, ötən il 3 tədbir - Azərbaycan Beynəlxalq “Françayzinq” (“Caspian Franchise Forum 2018”) forumu, Azərbaycan Beynəlxalq Hədiyyələr və Promo məhsulları (“Gift&Promo Fair”), eləcə də Azərbaycan Beynəlxalq “Reklam və Çap işləri” (“AdPrint”) sərgiləri ilk dəfə keçirilib. 2018-ci ildə regionda silah və hərbi texnika sahəsində ən böyük ekspozisiyalardan biri - müasir silah və texnikanın, Azərbaycan müdafiə sənayesi kompleksinin güc və qüdrətinin möhtəşəm nümayişi olan genişmiqyaslı “ADEX” müdafiə sərgisi üçüncü dəfə təşkil olunub. Ənənəvi sərgilərdən əlavə olaraq “CEO” şirkəti IAPH BAKU 2018 Dünya Limanları Konfransı çərçivəsində sərgi, birinci Bakı Beynəlxalq Qida Təhlükəsizliyi konfransı, Avropa Şəhərciyi 2018, Naxçıvanda Avropa Günləri və digər tədbirlərin təşkilində iştirak edib.
Sərgiləri xarici ölkələrdən 70-dən çox yüksəkrütbəli xarici qonaq ziyarət edib. 2018-ci ildə keçirilən sərgilərdə dünyanın 48 ölkəsini təmsil edən 1922 iştirakçı şirkət, habelə 64 ölkədən 69 min 812 ziyarətçi iştirak edib. Sərgilərdə təmsil olunan şirkətlərin sayına görə Rusiya Federasiyası, Türkiyə və Belarus müvafiq olaraq birinci, ikinci və üçüncü yerləri tutub. Yerli şirkətlərin stendləri ümumi ekspozisiya sahəsinin təxminən 40 faizini əhatə edib. Sərgilərdə 29 ölkədən 50 milli və regional stendlər təqdim olunub. Hər il sərgi iştirakçılarının tərkibinə xarici ölkələri təmsil edən yeni iştirakçılar qatılır. Sərgiləri daha çox Türkiyə, Rusiya, İran, Gürcüstan, Almaniya, Ukrayna, Birləşmiş Ərəb Əmirlikləri, Belarus, İtaliya, Çin və Qazaxıstandan olan qonaqlar ziyarət edib.
Bütün tədbirlərə dövlət strukturları tərəfindən yaxından dəstək göstərilir. Onların arasında Energetika, Kənd Təsərrüfatı, İqtisadiyyat, Səhiyyə, Nəqliyyat, Rabitə və Yüksək Texnologiyalar, Müdafiə, Təhsil nazirlikləri, SOCAR, Dövlət Turizm Agentliyi, Azərbaycan Turizm Təbliğat Bürosu, Qida Təhlükəsizliyi Agentliyi, Bakı Nəqliyyat Agentliyi, Mənzil İnşaatı Dövlət Agentliyi, Azərbaycan Memarlar İttifaqı, TRACECA, Dövlət Şəhərsalma və Arxitektura Komitəsi, Azərbaycan Stomatoloji Assosiasiyası, Azərbaycanda İxracın və İnvestisiyaların Təşviqi Fondu (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK), IDEA, beynəlxalq qurumları tərəfindən BMT-nin Dünya Turizm Təşkilatı, BMT-nin Ərzaq və Kənd Təsərrüfatı Təşkilatı (FAO), Beynəlxalq Telekommunikasiya İttifaqı (ITU), Asiya-Sakit okean Turizm Assosiasiyası, Rabitə sahəsində Regional Əməkdaşlıq Təşkilatı yer alıb.
2018-ci ildəki sərgiləri dəstəkləyən qurumların sırasına Kiçik və Orta Biznesin İnkişafı Agentliyi də (KOBİA) qoşulub. Beynəlxalq “Bakutel” sərgisində KOBİA ilə sərgi təşkilatçıları - “Iteca Caspian” və “CEO” şirkətləri arasında qarşılıqlı əməkdaşlıq haqqında memorandum imzalanıb. Memoranduma əsasən, hər iki tərəf kiçik və orta biznesi təmsil edən şirkətlərin beynəlxalq sərgilərdə iştirakına kömək edəcək. İlk əməkdaşlıq təcrübəsi artıq “Bakutel 2018” sərgisində həyata keçirilib və tədbir çərçivəsində KOB tərəfindən təşkil edilmiş stenddə 10 şirkət iştirak edib. Sərginin yekunlarına əsasən, stend iştirakçılarından bir sıra müsbət rəy alınıb və onlar gələcəkdə də sərgilərdə iştirak sayəsində inkişaf etməyi. yeni əlaqələr qurmağı planlaşdırırlar.
Ötən il sərgi layihələrinin uğurla həyata keçirilməsində tərəfdaş və sponsorların mühüm rolunu da qeyd etmək lazımdır. Belə ki, 2018-ci ildə sponsorlar qismində SOCAR, BP, “Maschio Gaspardo”, “NB Group”, Türkiyə Respublikasının Müdafiə Sənayesi Başqanlığı, “Equinor”, “Türkiye Petrolleri”, “Azeri Mi Drilling”, “Azfen”, “Baku Steel Company”, “Bos Shelf”, “Caspian Drilling”, “Caspian Marine Services”, “Global Energy Azerbaijan”, “SOCAR Polymer”, “Tekfen”, “REC”, “INPEX”, “Mcdermott”, “Dentons”, “DOW”, “EGS”, “EY”, “Kaspersky Lab”, “Lamor”, “Nobel Upstream”, “SAP CIS”, “Petronas”, SOCAR AQS, STP, TAP, “Tenaris”, “Total”, “Azercell”, “Kapital Bank”, “AA Services”, ölkə-tərəfdaş Bolqarıstan, “PASHA Bank”, “Lilac”, Bakı Konqres Mərkəzi, media tərəfdaşlar - “Caspian Energy International Media Group”, “Dom i Interyer”, “IHS Jane's Defence Weekly”, “Army Recognition” çıxış edib.
Müstəqil Azərbaycanda keçirilmiş ilk beynəlxalq sərgi və konfrans olan “Xəzər Neft və Qaz” (“Caspian Oil & Gas”) sərgi və konfransının 25 illik yubileyi təntənəli şəkildə qeyd edilib, tədbirdə dünyanın 38 ölkəsini təmsil edən 312 şirkət bir araya gəlib. Bu sərgini bir sıra yüksək səviyyəli xarici qonaqlar ziyarət edib. Sərginin birinci iş gününün əlamətdar hadisəsi isə “Xəzər Neft və Qaz” sərgi və konfransının 25 illik yubileyi münasibətilə təşkilatçıların mükafatlandırılması olub. “Xəzər Neft və Qaz” sərgisinin yubileyi sərginin keçirildiyi ilk gündən bu tədbiri dəstəkləmiş və onun təşəbbüskarı olmuş ümummilli lider Heydər Əliyevin anadan olmasının 95 illik yubileyinə təsadüf edib. Birinci sərgi 1994-cü ildə, elə həmin ilin sentyabr ayında Xəzər hövzəsində karbohidrogen ehtiyatlarının genişmiqyaslı işlənilməsinin əsas istiqamətlərini müəyyən edən və ölkəmizin neft tarixində yeni səhifə açan “Əsrin müqaviləsi”nin imzalanması ərəfəsində keçirilib. Ötənilki sərgidə uzun illər iştirak etmiş bütün şirkətlərə xatirə suvenirləri təqdim olunub, eləcə də unikal poçt markaları buraxılıb. Sərgilərə həsr edilmiş markalar Azərbaycanda ilk dəfə nəşr olunub. Təşkilatçılardan daha bir suvenir yubiley münasibətilə xüsusi hazırlanmış “Caspian Gold” ətri olub.
2019-cu ildə “Xəzər Neft və Qaz” sərgisi mayın 29-dan iyunun 1-dək Bakı Ekspo Mərkəzində, konfrans isə “Bilgah Beach Hotel” mehmanxanasında (30-31 may) keçiriləcək.
Ötən il təşkilatçıların təşəbbüsü ilə 240-dan çox şirkət “B2B” (biznes-biznes) formatlı görüşlərdə iştirak edərək, gələcək tərəfdaşlar ilə təkcə stenddə deyil, həm də xüsusi platformada görüşlər keçirib, danışıqlar aparıb. Hər sərgi çərçivəsində xüsusi olaraq yeni istehsal məhsul və xidmətlərinin nümayiş etdirilməsi üçün təqdimat zonası yaradılıb və şirkətlər burada öz yeni məhsullarını peşəkar ziyarətçilərə təqdim edib, eləcə də defile və debatlar keçiriblər.
“Bakutel” sərgisi çərçivəsində ilk dəfə olaraq “Bakutel Tech Talks” müzakirə platforması təşkil edilib. Üç panel - “Bizimkilər”, “Baxış bucağınızı bizimlə İT-iləyin” və “İdeyadan biznesə” 850 nəfərdən artıq insanı bir araya gətirib. Bu proqram sənayeni narahat edən aktual məsələlərə toxunmaqla yanaşı, sifarişçilər ilə layihəçilər arasında konstruktiv dialoq yaratmağa nail olub və startaplara öz layihələrini reallaşdırmaq istiqamətində kömək edib.
2019-cu ildə keçiriləcək sərgilərin tam cədvəli ilə şirkətlərin rəsmi veb-saytlarında www.iteca.az və www.ceo.az tanış olmaq mümkündür.