PAKİSTAN HƏRBİ TƏYYARƏÇİLƏRİNƏ UZUN SAQQAL SAXLAMAĞA İCAZƏ VERİLMİR

14.04.2006 [18:00]
Çap et
A⁺ A^-

AZƏRTAC Bi-Bi-Si-yə istinadla xəbər verir ki, Pakistanda hərbi təyyarəçilərin uzun saqqal saxlaması ilə əlaqədar artıq neçə vaxtdır mübahisələr gedirdi. Nəhayət, belə qərara gəldilər ki, onlar uzun saqqal saxlamamalıdırlar, cünki bu, dinlə deyil, təhlükəsizlik texnikası ilə bağlı məsələdir. Bu müddəanı Pakistan hökuməti də müdafiə etmişdir.

Təyyarəçilərin saqqalı ilə bağlı məsələ hətta Pakistan Milli Məclisində müzakirə olunmuşdur.

İclasda altı islam partiyasından ibarət müxalif alyansının nümayəndəsi Liakat Balok hökuməti dindar zabitlərin hüquqlarını məhdudlaşdırmaqda təqsirləndirmişdir.

Balokun sözlərinə görə, saqqalını qırxmaq istəməyən hərbi təyyarəçini işdən azad etmişlər və bu, yeganə hadisə deyildir. O demişdir ki, təyyarəçilər, sadəçə, şəriət qaydalarına riayət edirlər.

Lakin parlamentin müdafiə məsələləri üzrə katibi Tanvir Hüseyn bildirmişdir ki, müxalifətin iddialarına baxmayaraq, təyyarəcilərə saqqal saxlamaq qadağan olunmamışdır. Söhbət uçuş vaxtı təhlükə törədən çox uzun saqqallardan gedir.

Hüseynin sözlərinə görə, uzaq məsafələrə uçan təyyarəçilər oksigen maskalarından istifadə etməyə məcburdurlar. Bu vəziyyətdə uzun və səliqəsiz saqqal təyyarəçinin həyatı üçün təhlükəli ola bilər.

Parlamentin katibi bu məsələni rəsmi müzakirəyə çıxarmamağı xahiş etmişdir.

Lakin parlamentin sədri hökumətə gələcək müzakirələr üçün “saqqal siyasəti” barədə daha çox informasıya toplamağı tapşırmışdır.