PAKİSTANDA BAŞ VERMİŞ İKİ PARTLAYIŞ NƏTİCƏSİNDƏ AZI 39 ADAM HƏLAK OLMUŞDUR
Partlayıcı qurğular qadağan olmuş “Sipahi-Səhabə” sünni qruplaşmasının lideri Əzəm Təriqin qətlə yetirilməsinin ildönümü ilə əlaqədar dini mitinq zamanı işə salınmışdır. Polisin məlumatına görə, üç minə yaxın adamın iştirak etdiyi tədbir başa çatarkən mina qoyulmuş avtomobil izdihamın arasına girmişdir. İlkin məlumata görə, maşını intiharçı terrorçu idarə edirmiş, partlayıcı qurğunu da o işə salmışdır. Cəmi 20 saniyədən sonra avtomobilin yaxınlığındakı mina qoyulmuş motosiklet havaya sovrulmuşdur.
Parlamentin üzvü olan din xadimi Əzəm Təriq 2003-cü il oktyabrın 6-da İslamabad yaxınlığında qətlə yetirilmişdir. O zaman bu hadisə paytaxtın küçələrində kütləvi iğtişaşlara səbəb olmuşdu. Təriqin başçılıq etdiyi “Sipahi-Səhabə” qruplaşması şiələrə qarşı qanlı basqınları, habelə “Taliban” hərəkatını və “Əl-Qaidə”nin lideri Üsamə ben Ladeni dəstəkləməsi ilə tanınır.
Altı gün bundan əvvəl Pəncab əyalətinin şərqindəki Sialkot şəhərində intiharçı terrorçu şiə məscidində özünü partlatmışdı. O zaman 31 nəfər həlak olmuş, 50-dən artıq adam isə yaralanmışdı.
Bölmənin digər xəbərləri
