PAKİSTANDA QAR UÇQUNU ZAMANI 5 ALPİNİST HƏLAK OLMUŞ, 3-Ü İSƏ İTKİN DÜŞMÜŞDÜR
AZƏRTAC-ın xüsusi müxbiri Frans Press agentliyinə istinadla xəbər verir ki, Pakistanın şimalında dünyanın ikinci ən hündür K2 zirvəsində baş vermiş qar uçqunu zamanı 5 alpinist həlak olmuş, irlandiyalı, fransalı və onları müşayiət edən bələdçidən ibarət 3 nəfərlik qrup isə yoxa çıxmışdır.
İtkin düşənlərin axtarışı məqsədi ilə hadisə yerinə xilasedici vertolyotun göndərilməsini müzakirə edən Pakistan hərbçiləri zirvənin çox hündür olması ilə əlaqədar yaranacaq təhlükədən ehtiyat etdiklərini bildirmişlər.
Qar uçqunu alpinistləri zirvədən aşağı düşərkən yaxalamışdır. Yeddi nəfərlik başqa bir qrup xilas olmağa imkan tapmışdır.
Həlak olanların nəşinin çıxarılması və itkin düşənlərin axtarışı ilə əlaqədar ölkədə xüsusi xilasedici dəstənin təşkil edilməsi nəzərdə tutulmuşdur.
Xatırladaq ki, bir qədər əvvəl bir serb və bir italyan alpinist ölkənin şimalında həddindən artıq qayalıq olan Nanqa Porbat dağında həlak olmuşdur. Onların bələdçilərini xilas etmək mümkün olmuşdu.
Bölmənin digər xəbərləri
