“PALMALİ” ŞİRKƏTLƏR QRUPU “NƏSİBƏ ZEYNALOVA” ADINA TANKERİ İSTİFADƏYƏ QƏBUL ETMİŞDİR
AZƏRTAC xəbər verir ki, mayın 31-də Rusiyanın Nijni Novqorod şəhərinin “Krasnoye Sormovo” gəmiqayırma zavodunda “PALMALİ” Şirkətlər Qrupunun sifarişi ilə tikilmiş növbəti tankerin suya buraxılma mərasimi keçirilmişdir. Gəmiyə tanınmış səhnə ustası, görkəmli sənətkarımız, xalq artisti Nəsibə Zeynalovanın adı verilmişdir.
Tankerin layihəsi Odessa şəhərinin gəmi mühəndisliyi bürosu tərəfindən hazırlanmışdır və o, bütün beynəlxalq ekoloji standartlara cavab verir.
Bu seriyadan olan tankerlərin dedveyti dənizdə 4,60 metr, suya oturmada 7008 ton, çayda 3,60 metr, suya oturmada 4611 tondur. Gəminin uzunluğu 139,95 metr, eni 16,6 metr, göyərtəsinin hündürlüyü 6 metrdir.
Şirkətin Bakı ofisindən verilən xəbərə görə, tankerin suya salınma mərasimində şirkətin vitse-prezidenti Rauf Əliyev, Nijni Novqorod əyalətinin və Sormovo inzibati rayonunun rəhbərliyi, “Krasnoye Sormovo” zavodunun nümayəndələri və işçiləri iştirak etmişlər.
Mərasimin sonunda dənizçi ənənəsinə uyğun olaraq tankerin “xaç anası” - Nəsibə Zeynalovanın nəvəsi Nəsibə Əsgərova şampan şərabı şüşəsini gəminin göyərtəsinə çırpmışdır.
Yüksək dərəcədə avtomatlaşdırılmış gəminin heyəti 12 nəfərdən ibarət olacaqdır. Tanker Qara, Azov, Baltik və Aralıq dənizlərində daşımalar həyata keçirəcəkdir.
######
Bölmənin digər xəbərləri
