Pandemiya Avropada işlənmiş mallar bazarının dövriyyəsini onun dörddəbir hissəsi qədər artırıb
Budapeşt, 6 may, AZƏRTAC
Bu günlərdə "Daily Hungary" nəşrində ekspertlərin onlayn-satış sahəsində maraqlı müsahibəsi dərc edilib. Məlum olub ki, karantin dövründə avropalılar daha çox geyilmiş paltar və ayaqqabı satıb-almağa başlayıblar. Ekspertlər tələb və təklifin artmasını bununla izah edirlər ki, böhran dövründə insanların gəliri xeyli azalıb. Buna görə də onlar məhz bu yolla vəziyyətdən çıxmaq qərarına gəliblər. Kimisi öz qarderobundakı köhnə əşyalardan qurtulur və bunun müqabilində əlavə avrosent və dolabında boş yer əldə edir, kimisi də ailə büdcəsinə ziyan vurmadan mal alır.
AZƏRTAC xəbər verir ki, karantin başlanandan internetdə işlənmiş əşyaların dövriyyəsi onun dörddəbir hissəsi qədər artıb.
Qeyd edək ki, Avropa İttifaqında geyilmiş paltar bazarı öz aktuallığını heç vaxt itirməyib. Nə qədər qəribə olsa da, bəzən hətta imkanlı adamlar da bundan istifadə edirlər. İş o yerə çatır ki, bəzən paltarlar 1 avro qiymətə satışa çıxarılır, bu da sövdələşmənin baş tutması məqsədi ilə görüş üçün zəruri olan avtobus biletinin və ya bir litr benzinin qiymətindən xeyli aşağıdır.
Geyilmiş paltarları çox vaxtı yaşı 30-dan yuxarı olan adamlar alıb-satırlar.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
