Paris, 19 dekabr (AZƏRTAC). Dekabrın 18-də Parisdəki Azərbaycan Mədəniyyət Mərkəzində ölkəmizin Fransadakı səfirliyinin təşkilatçılığı ilə artıq fransız musiqisevərlərinə yaxşı tanış olan gənc cazmen, Azərbaycan Respublikasının Əməkdar Artisti İsfar Sarabskinin solo konserti təşkil edilmişdir.

Tədbiri açan səfirliyin mədəniyyət məsələləri üzrə birinci katibi Ayaz Qocayev caz musiqisinin Azərbaycanda populyar olduğundan danışmışdır. Bildirmişdir ki, Vaqif Mustafazadə və Rafiq Babayev kimi sənət ustaları tərəfindən bu janr inkişaf etdirilmiş, XX əsrin sonlarında xalqımızın qədim musiqisi olan muğamla cazın sintezi əsasında caz-muğam forması yaranmışdır. Diqqətə çatdırılmışdır ki, Azərbaycan caz sənətinin görkəmli simalarının yolunu uğurla davam etdirən İsfar Sarabski 2009-cu ildə İsveçrənin Montrö şəhərində beynəlxalq caz festivalının qalibi olmuş, gəncliyinə baxmayaraq müxtəlif caz festivallarında ölkəmizi layiqincə təmsil etmişdir.

Gənc cazmen konsertdə P.Çaykovskinin və V.Mustafazadənin əsərləri ilə yanaşı, özünün bəstələdiyi musiqi parçalarını da ifa etmişdir. Onu kontrabasda Makar Novikov, zərb alətlərində Aleksandr Maşin və tarda Şəhriyar İmanov müşayiət etmişlər.

Azərbaycanlı cazmenin çıxışı tamaşaçılar tərəfindən böyük maraqla qarşılanmışdır.

Konsertdə Fransa parlamentinin deputatları, fransız ictimaiyyətinin nümayəndələri, diasporumuzun təmsilçiləri və bu ölkədə təhsil alan azərbaycanlı tələbələr iştirak etmişlər.

Konsert haqqında təəssüratını bölüşən tamaşaçı Jan-Lui Düma AZƏRTAC-a müsahibəsində dəfələrlə Azərbaycanda səfərdə olduğunu bildirmişdir. O demişdir: “Dünyəvi və tolerant ölkəniz təbii mənzərələri, qədim və zəngin tarixi abidələri, mədəniyyəti ilə sözün əsl mənasında məni məftun etmişdir. Elə buna görə də Azərbaycan ilə bağlı bütün tədbirlərdə iştirak edirəm. Onun zəngin incəsənətinə ürəkdən bağlanmışam. Müxtəlif formada təqdim olunan incəsənətiniz məndə Azərbaycanın istedadlılar diyarı olması fikrini yaratmışdır. Bu axşamkı caz konserti də özlüyündə bunu bir daha təsdiq etmişdir”.

Əsgər Əliyev

AZƏRTAC-ın xüsusi müxbiri

Paris