PARİSLİLƏR YENƏ AZƏRBAYCAN İFAÇILARINI ALQIŞLAYIRLAR
Dekabrın 4-5-də Parisin ən böyük konsert salonu olan “Site müzik”də Cabbar Qaryağdı adına muğam üçlüyünün və kiçik yaşlı uşaqlardan ibarət “Azəri” muğam qrupunun ifasında Qarabağ həsrətli mahnılar səslənmişdir. Fransa Musiqi Mərkəzi tərəfindən təşkil edilmiş konsertdə balaca müğənnilər Leyla Rəhimova, Arzuman Abdullayev, Vilayət Babayev və Aydın Rzayevin ifasında səslənmiş “Qarabağ” şikəstəsi, “Oxu bülbül”, “Qaragilə” və digər mahnılar dinləyicilər tərəfindən hərarətlə qarşılanmış, dəfələrlə səhnəyə qaytarılmışlar.
Musiqimizə vurğun olan fransızlar Cabbar Qaryağdı adına muğam üçlüyünün yaradıcısı xanəndə Zahid Quliyevin ifa etdiyi xalq mahnılarını da sürəkli alqışlarla qarşılamışlar.
Müğənniləri kamançada Elşən Mansurov, tarda Elçin Nağıyev müşayiət etmişlər.
Konsertlə bağlı məlumat kitabçasında son dövrlərdə Fransada Azərbaycan musiqisinə marağın artması, muğamların məharətli ifaçılarının bu ölkəyə tez-tez qastrol səfərlərinə gəlməsi xüsusi vurğulanmışdır. Eyni zamanda xalqımızın sərvəti olan milli musiqimizin tarixiliyindən, ayrı-ayrı muğamlarımızın məzmunundan söhbət açılmış, bəzilərindən müəyyən parçaların fransız dilinə tərcüməsi verilmiş, balaca ifaçıların qısa tərcümeyi-halı dərc olunmuşdur.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
