Pasxa bayramı Ukraynada koronavirusa tutulanların sayının yenidən artımına səbəb olub
Kiyev, 29 aprel, AZƏRTAC
Ukraynada Pasxa bayramında əhalinin kütləvi tədbirlərdə iştirakı ölkədə koronavirusa tutulanların sayının artmasına səbəb olub. AZƏRTAC ölkənin Səhiyyə Nazirliyinə istinadla xəbər verir ki, Ukraynada son sutkada 456 nəfər koronavirusa yoluxub. Bunlardan 33-ü uşaq, 133-ü tibb işçisidir. Bununla da Ukraynada koronavirusa tutulanların sayı 9866 nəfərə çatıb. Ölkədə son sutka ərzində 11 nəfər ölüb. Ümumilikdə, koronavirusdan ölənlərin sayı 250 nəfərə çatıb. Koronavirusdan ölənlərin 85 faizində ürək-damar xəstəlikləri, şəkərli diabet, böyrək çatışmazlığı kimi xəstəliklər olub. Yoluxanlardan 1103 nəfər tam müalicə olunaraq evlərinə buraxılıb.
Ukraynada COVID-19-a yoluxanların 60 faizi 30-59, 20,7 faizi isə 60-100 yaşlı insanlardır.
Qeyd edək ki, ölkədə mayın 11-dək bütün beynəlxalq uçuşlar dayandırılıb, karantin elan edilib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
