PAYTAXTIN BƏZİ KÜÇƏ VƏ YOLLARINDA NƏQLİYYAT VASİTƏLƏRİNİN HƏRƏKƏTİ MƏHDUDLAŞDIRILACAQDIR
Bakı Şəhər Dövlət Yol Polisi İdarəsinin şöbə müdiri Vaqif Əsədov AZƏRTAC-a bildirmişdir ki, mayın 9-10-da Bakı şəhərində keçiriləcək kütləvi tədbirlərlə əlaqədar hərəkət iştirakçılarının təhlükəsizliyinin təmin edilməsi məqsədi ilə paytaxtın bəzi küçə və yollarında nəqliyyat vasitələrinin hərəkəti məhdudlaşdırılacaqdır.
Bakı Şəhər Baş Polis İdarəsinin Dövlət Yol Polisi İdarəsi əhalinin, avtomobil sahiblərinin və sürücülərin nəzərinə çatdırır ki, mayın 10-da ulu öndər Heydər Əliyevin 85 illik yubleyinin yüksək səviyyədə qeyd olunması münasibətilə respublikanın bütün bölgələrində, xüsusilə Bakı şəhərində bir sıra kütləvi və əyləncə xarakterli tədbirlərin keçirilməsi planlaşdırılmışdır.
Mayın 10-da səhər saat 7.00-dan tədbir qurtaranadək Parlament prospekti və Fəxri xiyaban istiqamətində və ona bitişik küçələrdən bu istiqamətə bütün nəqliyyat vasitələrinin hərəkət istiqaməti dəyişdiriləcəkdir. Yəni Əzizbəyov heykəli tərəfdən Parlament prospekti istiqamətinə, Mikayıl Müşfiq dairəsindən, Milli Məclisin inzibati binasının yanından, Mehdi Hüseyn küçəsindən Teleteatr binası yanından bu istiqamətlərə bütün avtomobillərin hərəkəti məhdudlaşdırılacaq və istiqamət dəyişdiriləcəkdir. Bundan əlavə, Heydər Əliyev adına Sarayın qarşısındakı parkda keçiriləcək tədbirlər zamanı R.Behbudov, Füzuli, S.Vurğun, Ş.Bədəlbəyli küçələri və Bülbül prospekti istiqamətində də avtomaşınların hərəkəti məhdudlaşdırılaraq istiqamət dəyişdiriləcəkdir.
Daha sonra Milli Parkda keçiriləcək konsert və atəşfəşanlıq zamanı hərəkət iştirakçılarının təhlükəsizliyini təmin etmək məqsədi ilə Bəhramgürun heykəli qarşısından, Azneft meydanı yanından, Neftçilər prospekti boyunca Azadlıq meydanı istiqamətində də avtomobillərin hərəkəti müvəqqəti məhdudlaşdırılacaq, daha sonra tədbirin keçirilməsi ilə əlaqədar geniş miqyasda Bakı qarnizonu qoşunlarının iştirakı ilə nizami gəzintinin (Qutuların və avtomobil karvanlarının hərəkətinin təşkil olunması) təşkil olunması ilə əlaqədar avtomobil karvanlarının da sərbəst, rahat və təhlükəsiz hərəkətini təmin etmək məqsədi ilə bir sıra küçə və yollarda avtomobillərin hərəkəti məhdudlaşdırılacaqdır.
Gəncə, Bülbül, Neftçilər, N.Nərimanov, İnşaatçılar, H.Cavid, Tbilisi, Atatürk prospektləri, Azadlıq, Füzuli, Fəvvarələr meydanları, Neapol, Bayıl dairələri, Zığ şosesi, Səməd Vurğun bağı, 28 May, Ə.Ələkbərov, R.Behbudov, H.Hacıyev, Gənclik, S.Mehmandarov, F.Xoyski, İzmir, A.Bakıxanov, S.Məmmədova küçələri, Nəriman Nərimanovun heykəli, Zabitlər bağı, Milli Sirkin qarşısı, Heydər Əliyev adına Saray, Dillər Universiteti, “Spartak” stadionu, Gənclik, N.Nərimanov, Q.Qarayev, Neftçilər metrostansiyalarının, 8-ci kilometr qəsəbəsindəki Heydər Əliyev parkının qarşısı, Heydər Əliyev adına İdman Konsert Kompleksi, Ayna Sultanovanın heykəli istiqamətlərində və sair yollarda avtomobillərin hərəkəti məhdudlaşdırılmaqla istiqamət dəyişdiriləcəkdir.
BŞDYPİ əhalinin, avtonəqliyyat sahiblərinin və sürücülərin nəzərinə çatdırır ki, tıxacların və digər xoşagəlməz halların qarşısının alınması və tədbir iştirakçılarının təhlükəsizliyinin təmin edilməsi məqsədi ilə avtomobillərdən mümkün qədər az istifadə etsinlər.
