PENİTENSİAR SİSTEMİN FƏALİYYƏTİ DİQQƏT MƏRKƏZİNDƏDİR
Ədliyyə naziri Fikrət Məmmədov müşavirədə çıxış edərək, baş idarənin fəaliyyətində yol verilmiş ciddi nöqsanların və qanun pozuntularının aradan qaldırılması ilə bağlı Azərbaycan Prezidenti İlham Əliyevin tapşırığına əsasən həyata keçirilən kompleks tədbirlərdən danışmışdır.
Qeyd edilmişdir ki, baş idarənin fəaliyyətində aşkar edilmiş kobud qanun pozuntularının, sui-istifadə hallarının aradan qaldırılması üçün təsirli tədbirlər görülmüş, tələbkarlıq və nəzarət gücləndirilmiş, cəzaların icrasına nəzarət üzrə müfəttişlik fəaliyyətə başlamış, 200-dən çox əməkdaş cəzalandırılmış, 60 vəzifəli şəxs işdən azad olunmuş, vəzifə səlahiyyətləri ilə bağlı cinayətlər törətmiş şəxslər məsuliyyətə alınmış, kadr işi sağlam meyarlar və müasir tələblər əsasında yenidən qurularaq, penitensiar sistemə və tibb xidmətinə işə qəbulla bağlı açıq müsabiqə elan olunmuş, yüksək peşə hazırlığına və mənəvi keyfiyyətlərə malik mütəxəssislər işə götürülmüşdür.
Məhkumların saxlanma şəraiti, ərzaq və digər təminatları, onlara göstərilən tibb-sanitariya xidməti yaxşılaşdırılmış, nizam-intizam gücləndirilmiş, bütün müəssisələrdə abadlaşdırma və təmir-tikinti işləri aparılmışdır.
Penitensiar sistemin fəaliyyətində şəffaflıq və aşkarlıq təmin edilmiş, hüquq müdafiəçiləri və QHT nümayəndələri ilə mütəmadi görüşlər keçirilmiş, onların cəzaların icrası yerlərinə maneəsiz baş çəkməsi və monitorinqlər aparması, səmərəli ictimai nəzarətin həyata keçirilməsi üçün zəruri təşkilati tədbirlər görülmüşdür.
Bununla yanaşı, bir çox nöqsanların hələ də mövcud olduğunu diqqətə çatdıran nazir, cavabdeh şəxslərə ciddi xəbərdarlıq etmiş, fəaliyyətlərində qısa müddətdə dönüş yaratmalarını tələb etmiş və işin təkmilləşdirilməsi üzrə qarşıda duran vəzifələri vurğulamışdır.
Ədliyyə nazirinin müavini, Məhkəmə Qərarlarının İcrası Baş İdarəsinin yeni rəisi Nazim Ələkbərov çıxış edərək, baş idarənin fəaliyyətinin dövlətimizin başçısının tələbləri səviyyəsində qurulması, qeyd olunan ciddi nöqsanların aradan qaldırılması üçün kollektivin əzmlə çalışacağını bildirmişdir.
Müşavirədə digər çıxış edənlər penitensiar sistemdə qanunçuluğun möhkəmləndirilməsi, nizam-intizamın və tələbkarlığın gücləndirilməsi, kadrlarla işin yenidən qurulması üzrə görülən tədbirləri razılıqla qeyd edərək, qarşıya qoyulmuş vəzifələri lazımınca yerinə yetirmək üçün əllərindən gələni əsirgəməyəcəklərini bildirmişlər.
