Pərvin Kərimzadə: Sosial rifahın yeganə qarantının Prezident İlham Əliyev olduğu bir daha təsdiqləndi
Gəncə, 11 aprel, Rauf Hacıyev, AZƏRTAC
Bu gün ölkəmizin ictimai-siyasi həyatında əhəmiyyətli rol oynayan 2018-ci ilin 11 aprel seçkilərinin bir ili tamam olur. Ötən bir ilin hər ayı, hər günü müdrik xalqımızın taleyüklü məsələdə, ulu öndər Heydər Əliyevin layiqli varisi İlham Əliyevə yenidən etimad göstərərək Prezident seçməkdə yanılmadığını təsdiq etdi. Ölkə vətəndaşları, həmçinin milli maraqlara söykənən praqmatik və düşünülmüş siyasət nəticəsində ölkədə bərqərar olmuş ictimai-siyasi sabitliyə, dayanıqlı və dinamik inkişafa, xalq-iqtidar birliyinə növbəti dəfə səs vermiş oldular.
Bu fikirləri AZƏRTAC-ın bölgə müxbirinə müsahibəsində Milli Məclisin deputatı Pərvin Kərimzadə deyib.
“2018-ci il dərin iqtisadi islahatlar ili oldu və bu islahatların nəticələrinin bəhrəsini bütün sahələrdə görürük. Dünyada mürəkkəb proseslərin cərəyan etdiyi bir dövrdə iqtisadiyyatımızın dayanıqlığı təmin olundu, qeyri-neft ixracının stimullaşdırılması, aqrar sahəyə dövlət dəstəyinin artırılması istiqamətində ciddi addımlar atıldı. Bütün istiqamətlər üzrə yeni-yeni nailiyyətlər qazanıldı. Sosial-iqtisadi inkişafın keyfiyyətcə yeni mərhələsində vətəndaşların mənafeyinə xidmət edən islahatların dərinləşdirilməsi prioritet istiqamətlərdən oldu”, - deyə P.Kərimzadə qeyd edib.
Onun sözlərinə görə, 2019-cu ilin əvvəlindən minimum əməkhaqlarının, əmək pensiyalarının, bütün növ sosial müavinətlərin, təqaüdlərin əhəmiyyətli dərəcədə artırılması, xarici valyutada götürülmüş kreditlərin devalvasiya nəticəsində artan hissəsinin ödənilməsi barədə qərarın qəbul edilməsi 2003-cü ildən yeni vüsət alan müstəqil dövlət quruculuğu istiqamətində qazanılan nailiyyətlər nəticəsində mümkün olub.
Pərvin Kərimzadə deyib: “Tarixin səhifələrini geri vərəqləsək, hələ ötən il aprelin 18-də keçirilən andiçmə mərasimində Prezident İlham Əliyev ciddi islahatlar aparılacağını, islahatları dərinləşdirəcəyini, vətəndaşlarımızın yaşayış səviyyəsinin daha da yaxşılaşdırılmasına yönələn addımların atılmasını vəd etmişdi. Hər zaman sözü ilə əməli bir olan, xalqına arxalanan və siyasətinin mərkəzində Azərbaycan vətəndaşı dayanan dövlət başçısı bu dəfə də vədini yerinə yetirdi. Sosial inqilab xarakterli qərarlar, fərman və sərəncamlar əhalinin bütün təbəqələrini əhatə etdi. Ötən bir ildə də Prezident İlham Əliyevin daim xalqla bir olduğunun, hər bir vətəndaşa xüsusi diqqət və həssaslıqla yanaşdığının şahidi olduq. Məhz, bunun üçün də müdrik və uzaqgörən Azərbaycan xalqı öz Prezidentinin humanizm prinsiplərinə söykənən sosialyönümlü siyasətini birmənalı olaraq dəstəkləyir və hər zaman dövlət başçısının yanında olduğunu bildirir. Fransanın nüfuzlu tədqiqat mərkəzlərindən biri olan “Opinion Way” şirkətinin Azərbaycan Prezidentinin son bir ildəki fəaliyyəti ilə bağlı ölkəmizdə keçirdiyi rəy sorğusunun nəticələri də bunu təsdiqləyir. Bir daha təsdiq edildi ki, ölkəmizdə xalq-iqtidar birliyi hökm sürür. Xalq Prezident İlham Əliyevin yorulmadan dövlətçiliyin möhkəmləndirilməsi, xalqın firavan həyat şəraitinin inkişaf etdirilməsi naminə apardığı inqilabi islahatları, daxili və xarici siyasəti yüksək qiymətləndirir. Bütün bunlar dünyanı bürüyən mürəkkəb və ziddiyyətli proseslər dövründə ölkəmizin siyasi sabitliyinin, iqtisadi inkişafının, sosial rifahının yeganə qarantının Prezident İlham Əliyev olduğunu təsdiq edir”.
Bölmənin digər xəbərləri
