Polşa Seymi prezident seçkilərində poçt vasitəsilə səsverməyə icazə verib
Bakı, 6 may, AZƏRTAC
Polşa seymi prezident seçkilərində poçt vasitəsilə səsvermə barədə qanun layihəsini dəstəkləyib.
AZƏRTAC Interfax informasiya agentliyinə istinadla xəbər verir ki, parlament dəftərxanasının məlumatına görə, 236 deputat qanunun lehinə, 213 deputat isə əleyhinə səs verib, 11 qanunverici bitərəf qalıb.
Beləliklə, Seym mayın 5-də Senatın qanun layihəsinə qoyduğu vetodan yan keçib. Bundan sonra sənədi prezident Anjey Duda imzalamalıdır.
Bir müddət öncə hakim koalisiyaya daxil olan “Qanun və ədalət” və “Həmrəylik” partiyalarının liderləri Yaroslav Kaçinski və Yaroslav Qovin poçt vasitəsilə səsvermə ideyasını dəstəkləmişdi. Onlar birgə bəyanatda pandemiya şəraitində vətəndaşların təhlükəsizliyi baxımından buna razılıq verdiklərini bildirmişdilər.
Həmçinin Yaroslav Kaçinski və Yaroslav Qovin seçkilərin təxirə salınması və seçkinin yeni tarixinin Seym spikeri tərəfindən təyin olunması barədə də razılığa gəliblər.
Polşada prezident seçkiləri mayın 10-da keçirilməli idi. Seçkilərdə aralarında hazırkı Prezident Anjey Dudanın da olduğu 10 namizəd iştirak edir.
Bölmənin digər xəbərləri
