Bakı, 9 oktyabr, AZƏRTAC

İşğalçı Ermənistan ordusu sentyabrın 27-də ölkəmizə qarşı genişmiqyaslı təxribata başlayanda Nikol Paşinyan və ətrafı tezliklə Azərbaycanın daha bir neçə rayonunu işğal edəcəklərini, neçə illərdən bəri “böyük Ermənistan” dövləti yaratmaq ideyasını reallaşdıracaqlarını xəyal edirdilər. Sanki 2016-cı ilin Aprel döyüşlərində, 2018-ci ilin Günnüt əməliyyatında, 2020-ci ilin Tovuz təxribatında acınacaqlı şəkildə məğlub olduqlarını unutmuşdular. Həmin döyüşlərdə Azərbaycanın 27 il işğal altında olan ərazisinin 13 min hektardan çoxu, həmçinin bir sıra strateji yüksəkliklər Silahlı Qüvvələrimizin nəzarəti altına keçdi. Bütün dünya Azərbaycan Ordusunun gücünə, qüdrətinə bələd olsa da, işğalçı Ermənistan bu həqiqəti qəbul etmək istəmirdi. Nəhayət, sentyabrın 27-dən başladıqları genişmiqyaslı təxribat zamanı aldıqları ciddi zərbələr Ermənistan rəhbərliyini qəflət yuxusundan ayıltdı və qarşısında çox güclü, qüdrətli Azərbaycan Ordusunu gördü.

Bu fikirləri AZƏRTAC-a Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.

Ç.Qənizadə deyib ki, Azərbaycan Silahlı Qüvvələrinin qarşısında cəmi 12 gün davam gətirən Ermənistan ordusu qaçıb gizlənməyə yer axtarır. Prezident, Ali Baş Komandan İlham Əliyevin düşünülmüş gedişləri, qətiyyəti və cəsarəti qarşısında diz çökən Nikol Paşinyan danışıqlar masası arxasında əyləşməyə məcbur qaldı. Ümidləri hər yerdən üzülmüş Nikol Paşinyan hansı dövlət başçısına kömək üçün müraciət etsə də, ona bildirdilər ki, Azərbaycan öz ərazisində vuruşur. Yəni, başladığın müharibəni özün də dayandır. Hansı ölkə işğalçıya kömək edər? Bütün bunlardan sonra Nikol Paşinyanın Azərbaycan Prezidentinə təslim olmaqdan başqa ayrı əlacı qalmadı. İndi də bar-bar bağırır ki, Ermənistan Qarabağla bağlı sülh danışıqlarına başlamağa hazırdır.

Bu da işğalçının aqibəti. Onu bu vəziyyətə Prezident İlham Əliyevin əzmi və qətiyyəti saldı. İndi dünya birliyinə də bəlli oldu ki, Azərbaycan Prezidenti praqmatik düşüncəli, milli maraqları hər şeydən üstün tutan qətiyyətli dövlət başçısıdır. Ermənistanın baş naziri Nikol Paşinyan tərəfindən ağ bayraq qaldırılması da bunun göstəricisidir. Azərbaycana qarşı iddia və hikkələrlə danışan Paşinyan artıq kapitulyasiya olmaq astanasındadır. Halbuki, bir qədər əvvəl Azərbaycana şərtlər qoymuşdu. Sanki unudurdu ki, danışıqlarda Azərbaycana şərt qoymaq, danışıqlar prosesinin formatını dəyişmək kimi şərt qoymaq qeyri-mümkündür. Onun bütün iddiaları darmadağın edildi. Ermənistan Azərbaycanın tələb etdiyi şərtlər əsasında danışıqlar prosesinə getmək üçün bu gün özü yalvarır.

Dövlətimizin başçısı ölkəmiz qarşısında şərt qoyan Nikol Paşinyana vaxtında xəbərdarlıq etmişdi. Demişdi ki, Ermənistan rəhbərliyi yaxşı düşünsün, hələ ki, gec deyil. Bizə yeddi şərt irəli sürür: “Sən kimsən ki, bizə şərt qoyasan?! İndi baxım görüm nə şərt qoyursan bizə! Yıxılıb diz çöküb yalvarırsan ki, atəşkəs bərpa olunsun. Atəşkəs Ermənistanın baş nazirinin xahişi ilə 2 il ərzində bərpa olunmuşdu. Məndən xahiş etmişdi ki, daxildə vəziyyət ağırdır, oradan-buradan məni sıxırlar, mənə vaxt verin, mən bu məsələni həll edəcəyəm, mən yeni fikirlərlə gəlmişəm. Mən keçmişdə nə olub hamısının üstündən xətt çəkmişəm, imkan verin, vaxt verin. Dedim yaxşı. Nə oldu? Bir ildən sonra çıxış edib deyir ki, “Qarabağ Ermənistandır”. İndi desin “Qarabağ Ermənistandır”.

Bu gün Nikol Paşinyan Azərbaycanın tələb etdiyi şərtlər əsasında danışıqlar prosesinə getmək üçün özü yalvarır. Danışıqlar prosesi baza prinsipləri, Helsinki Yekun Aktı və BMT Təhlükəsizlik Şurasının qətnamələri əsasında yenidən davam edəcək. Danışıqlar prosesində Prezident İlham Əliyevin tələb etdiyi kimi Ermənistan qoşunlarının Azərbaycanın işğal olunmuş ərazilərindən çıxarılmasını nəzərdə tutan vaxt qrafiki hazırlanmalıdır.

Prezident Silahlı Qüvvələrin Ali Baş Komandanı İlham Əliyev xalqa müraciətində öz mövqeyini birmənalı şəkildə bildirib: “Desin ki, mən Azərbaycanın ərazi bütövlüyünü tanıyıram, necə ki, baza prinsiplərində bu, təsbit edilib. Desin ki, mən işğal edilmiş torpaqlardan qoşunlarımızı çıxaracağam, necə ki, baza prinsiplərində bu, təsbit edilib. Desin ki, mən Azərbaycan xalqından üzr istəyirəm və desin ki, Qarabağ Ermənistan deyil. Sonuncu şərt budur ki, qrafik versin, işğal edilmiş torpaqlardan erməni silahlı qüvvələrinin çıxarılması cədvəli verilsin bizə. Onda biz əlbəttə ki, atəşkəs rejimini bərpa edəcəyik”.