SİYASƏT
Prezident İlham Əliyevin 20 illik fəaliyyəti dövrü Azərbaycan dövlətçiliyinin ən parlaq səhifələrindən biridir - RƏY
![Prezident İlham Əliyevin 20 illik fəaliyyəti dövrü Azərbaycan dövlətçiliyinin ən parlaq səhifələrindən biridir - RƏY](/files/2024/1/1200x630/1705050223584345602_1200x630.jpg)
Bakı, 12 yanvar, AZƏRTAC
Prezident İlham Əliyevin Azərbaycana rəhbərliyinin 20 ili, heç şübhəsiz, onun dövlətinə, xalqına və Vətəninə misilsiz xidmət dövrü kimi xarakterizə olunmalıdır. İyirmiillik fəaliyyət Azərbaycan dövlətçiliyinin ən şanlı, ən parlaq səhifələrindən birini təşkil edir. Ümumiyyətlə, prezidentlik fəaliyyəti dövründə İlham Əliyevin rəhbərliyi ilə dövlətimizin bütün sahələrdə qazandığı uğurlar hər birimizin gözü qarşısında baş verib və Azərbaycan bütün istiqamətlərdə möhtəşəm irəliləyiş əldə edib. 2003-cü ildə xalqımız doğru və müdrik qərar verərək dövlətimizin gələcəyini Ümummilli Lider Heydər Əliyevin siyasi kursunun layiqli davamçısı İlham Əliyevə etibar etdi. Dövlətimizin başçısının o zaman seçki marafonunda söylədiyi “Mən hər bir azərbaycanlının prezidenti olacağam” sözləri ötən illər ərzində özünün əməli təsdiqini tapdı.
Bu sözləri AZƏRTAC-a açıqlamasında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri fəlsəfə doktoru İlqar Orucov söyləyib.
İ.Orucov 20 il ərzində Azərbaycanda böyük inqilabi dəyişikliklərin baş verdiyini xatırladaraq deyib: “2003-cü ildən bu günə qədər Azərbaycana yatırılan investisiyanın həcmi 300 milyard ABŞ dollarıdır. Azərbaycanın strateji valyuta ehtiyatları artıq 2003-cü illə müqayisədə 1,6 milyard dollardan 67 milyard dollara qədər artıb. Adambaşına düşən büdcə xərcləri 2003-cü ildə ölkədə 150 manat idisə, indi bu rəqəm 3500 manata çatıb. Azərbaycanda yoxsulluğun səviyyəsi və onun azaldılması ilə bağlı həyata keçirilən kompleks tədbirlər öz bəhrəsini verib. Dövlətin sosial təminat xərcləri kifayət qədər yüksəlib. Bu onu göstərir ki, dövlətimizin başçısının həyata keçirdiyi siyasət sosialyönümlüdür və insanların daha firavan yaşamasına xidmət edir. 2003-cü ildə dövlətin sosial təminat xərcləri 678,2 milyon manat təşkil edirdisə, 2023-cü ildə bu rəqəm 12 milyard manat olub. Minimum əməkhaqqı, minimum pensiyanın məbləğində dəfələrlə artımlar baş verib.
Azərbaycan iqtisadi cəhətdən artıq inkişaf etmiş dövlətə çevrilib. İlham Əliyevin prezidentliyi dövründə 2006-cı il iyulun 13-də Bakı-Tbilisi-Ceyhan neft boru kəmərinin açılışı reallaşdı və elə həmin ilin dekabrında “Şahdəniz” yatağının ilk quyusu istismara verildi. Sonrakı illərdə daha bir neçə yatağın istismara verilməsi ilə Azərbaycan həm də öz qaz ehtiyatlarının dünya bazarına çıxarılması istiqamətində növbəti addımlarını atdı, Avropa bazarlarına çıxış imkanlarını daha da genişləndirdi”.
İ.Orucov Səngəçalda Cənub Qaz Dəhlizi layihəsinin təməli qoyulmaqla bütövlükdə Bakı-Tbilisi-Ərzurum, TANAP, TAP kimi transmilli qaz strategiyalarının həyata keçirilməsi üçün zəmin yarandığını xatırladaraq bildirib ki, məhz Prezident İlham Əliyevin təşəbbüsü, səyi və qətiyyəti nəticəsində dünyanın enerji xəritəsində yeni bir istiqamət formalaşıb.
“Dövlətimizin başçısının Azərbaycanın həm də karbohidrogen ehtiyatlarının dünya bazarına çıxarılması istiqamətində çox böyük işlər gördüyünün şahidiyik. Azərbaycan bu gün dünyada həm ciddi iqtisadi tərəfdaş, həm də siyasi baxımdan öz sözünü deyən, daim ədalətli mövqeyi ilə fərqlənən dövlət imicini qazanıb. Təbii ki, bunların hər birinin memarı Ulu Öndər siyasətinin layiqli davamçısı Prezident İlham Əliyevdir. Cənub Qaz dəhlizi çərçivəsində Trans-Adriatik boru kəmərinin istismara verilməsi Azərbaycan qazının Avropaya ixracına yol açdı. Bakı-Tbilisi-Qars dəmir yolunun istismarı nəticəsində Şərqdən Qərbə daşıyan yüklərdə Azərbaycanın mərkəzi funksiyanı öz üzərinə götürməsi xüsusi qeyd olunmalıdır. Ötən dövrdə ölkəmizin xarici ticarət dövriyyəsi təqribən 11 dəfə, ixracı isə 16 dəfədən çox artıb. Xarici valyuta ehtiyatlarımız 20 il ərzində təxminən 50 dəfəyə qədər çoxalıb. Bu illər ərzində təkcə paytaxtın simasının dəyişməsinin şahidi olmadıq, eyni zamanda, regionların inkişafı üçün çox ciddi, maliyyətutumlu dövlət proqramlarının icrasının reallaşdığını gördük. Bu gün Azərbaycan regionları sürətli inkişaf yoluna qədəm qoyub”, - deyə QHT sədri vurğulayıb.
O, həmçinin deyib ki, Prezident İlham Əliyevin hakimiyyəti dövründə Azərbaycanın BMT-nin Təhlükəsizlik Şurasına qeyri-daimi üzv seçilməsi və ona sədrlik etməsi ölkəmizin beynəlxalq qurumlarda təşəbbüskar mövqeyinin əyani nümunələrindən biridir. Azərbaycan, həmçinin dörd il müddətində Qoşulmama Hərəkatına sədrlik etməklə dünyada sülhün, ədalətin bərpası istiqamətində qətiyyətli mövqeyini bir daha ortaya qoyub. Siyasi fəaliyyətində hər zaman ölkəmizin milli maraqlarını əsas götürən dövlətimizin başçısının 20 illik prezidentliyi dönəmində güclü hərbi infrastruktura malik peşəkar ordu yaradıldı. Torpaqlarımızın işğaldan azad edilməsi istiqamətində aparılan ardıcıl siyasət nəticəsində 44 günlük Vətən müharibəsində Ali Baş Komandanın rəhbərliyi ilə şanlı Ordumuz ərazilərimizin 30 illik işğalına son qoyaraq böyük Zəfər qazandı. Biz məhz Prezident İlham Əliyevin rəhbərliyi dövründə ərazilərimizin suverenliyini tam təmin etdik. Bu, tariximizə qızıl hərflərlə yazılacaq bir səhifədir və bu Zəfəri bizə yaşadan xalqımızın alternativsiz Lideri, Azərbaycan Prezidenti, Müzəffər Ali Baş Komandan İlham Əliyevdir.