QAÇQIN VƏ MƏCBURİ KÖÇKÜNLƏRİN MƏSKUNLAŞDIĞI YATAQXANALAR TƏMİR OLUNACAQDIR
AZƏRTAC xəbər verir ki, Bakıda qaçqın və məcburi köçkünlərin məskunlaşdığı yataqxanalar təmir olunacaqdır.
Bu barədə məlumat verən Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirmişdir ki, Azərbaycan paytaxtında qaçqın və məcburi köçkünlərin məskunlaşdığı 60-dək yataqxanada əsaslı təmir işləri aparılacaqdır. Bu məqsədlə dövlət büdcəsindən kifayət qədər vəsait ayrılmışdır.
Əli Həsənov qeyd etmişdir ki, məktəb və hərbi liseylərin ərazilərində məskunlaşanların köçürülməsi üçün də yeni qəsəbələr tikiləcəkdir. Hazırda Goranboy və Beyləqanda hər biri 500 evdən ibarət qəsəbələr salınır. Bu qəsəbələrdə lazımi infrastruktur yaradıldıqdan sonra məcburi köçkünlər bu yaşayış məntəqələrinə könüllülük prinsipi əsasında köçürüləcəklər.
