“QADINLAR SÜLH NAMİNƏ” SƏRGİSİ AÇILMIŞDIR
“Abşeron” Rəsm Qalereyasında “Qadınlar sülh naminə” adlı sərgi açılmışdır. Bu, “Qadınlar Cənubi Qafqazda münaqişələrin qarşısının alınması və sülh yaradılması uğrunda” regional layihəsinin tərkib hissəsidir.
BMT-nin Qadınlar üçün İnkişaf Fondunun, “Labirint” İctimai Yaradıcılıq Birliyinin və “Abşeron” Rəsm Qalereyasının təşəbbüsü ilə təşkil edilmiş sərgiyə 61 müəllifin, o cümlədən 31 məktəblinin 80 əsəri təqdim olunmuşdur. Bunlar, əsasən, insanların sülh və əmin- amanlıq, dinc yaşamaq arzularını, vətənpərvərlik, nəcib və xeyirxah duyğularını, işıqlı gələcəyə nikbin inamlarını əks etdirir.
Tədbiri “Abşeron” Rəsm Qalereyasının direktoru Eldəniz İbrahimov açdı. BMT-nin Qadınlar üçün İnkişaf Fondunun Azərbaycan üzrə əlaqələndiricisi Gülşən Paşayeva çıxış edərək, Cənubi Qafqaz ölkələrində sülhə həsr olunmuş sərgilərin keçirilməsini yüksək dəyərləndirdi. Ermənistan tərəfindən işğal olunmuş torpaqlarımızın sülh yolu ilə azad edilməsi üçün Azərbaycan Prezidenti Heydər Əliyevin apardığı məqsədyönlü siyasətin əhəmiyyətini xüsusi vurğuladı.
Qadın Problemləri üzrə Dövlət Komitəsinin sədri, professor Zəhra Quliyeva, xalq rəssamı Altay Hacıyev və başqaları bəşəriyyətin sülh, əmin-amanlıq arzularından, onun bütün dünyada qorunub saxlanmasının vacibliyindən danışdılar, sərgi haqqında ürək sözlərini söylədilər.
Sərgidə nümayiş etdirilən ən yaxşı işlərin müəlliflərinə mükafatlar təqdim olundu.
Bölmənin digər xəbərləri
