“QADINLARIN SAHİBKARLIQ FƏALİYYƏTİNƏ YARDIM” LAYİHƏSİ ÇƏRÇİVƏSİNDƏ SEMİNAR-GÖRÜŞ

28.11.2003 [12:38]
Çap et
A⁺ A^-

Müstəqil Hüquq Mərkəzi ATƏT-in Bakı ofisinin maliyyə dəstəyi ilə həyata keçirdiyi “Qadınların sahibkarlıq fəaliyyətinə yardım” layihəsi çərçivəsində seminar-görüş təşkil etmişdir. Birinci mərhələdə “Azərbaycanda qadınların sahibkarlıq fəaliyyətinin əsas istiqamətləri, problemləri və perspektivləri” mövzusunda konfrans keçirmişdir. Konfransda səfirliklərin, dövlət orqanlarının, ATƏT-in Bakı ofisinin nümayəndələri və Azərbaycanın 10 regionunda fəaliyyət göstərən sahibkar qadınlar iştirak etmişlər. Sonra seminar-görüş Zuğulbadakı “Gənclik” Beynəlxalq Turizm Kompleksində davam etmişdir.

Mərkəzdən AZƏRTAC-a bildirmişlər ki, görüşdə beynəlxalq təşkilatların nümayəndələri, alim və mütəxəssislər iştirak etmiş, qadınların sahibkarlıq fəaliyyəti ilə bağlı görülən işlər barədə məlumat vermişlər. Görüş iştirakçıları yoxsulluğun azaldılmasında, yeni iş yerlərinin açılmasında, regionlarda sahibkarlığın inkişafında qadınların rolundan danışmış, sahibkarlıq fəaliyyətinin hüquqi əsasları, müdafiə mexanizmi və s. barədə məlumat vermişlər.

Seminar-görüşdə Bakıda və regionlarda fəaliyyət göstərən qadınlardan ibarət Əlaqələndirmə Şurası yaradılmışdır.