“QAFQAZA SƏYAHƏT”İN İLK TAMAŞASI
Noyabrın 30-da M.F.Axundov adına Dövlət Akademik Opera və Balet Teatrında tanınmış bəstəkar, xalq artisti, Dövlət mükafatı laureatı, professor Aqşin Əlizadənin fransız yazıçısı Aleksandr Dümanın eyniadlı əsərinin motivləri əsasında yazdığı “Qafqaza səyahət” baletinin ilk tamaşası olmuşdur.
Məlum olduğu kimi, Aleksandr Düma Azərbaycana səfəri ilə bağlı zəngin təəssüratlarını qələmə alarkən, xan qızı Xurşidbanu Natəvanla görüşünə xüsusi yer ayırmışdır. Məhz bu hadisə baletdə musiqinin və xoreoqrafiyanın dili ilə tamaşaçılara nəql edildi.
Tamaşanın quruluşçu baletmeysteri xalq artisti, Dövlət mükafatı laureatı Tamilla Şirəliyeva, musiqi rəhbəri və dirijoru əməkdar incəsənət xadimi Cavanşir Cəfərov, quruluşçu rəssamı əməkdar rəssam Tahir Tahirovdur.
Aleksandr Düma və Xurşidbanu Natəvan partiyalarını “2002-ci ilin ən yaxşı balet artisti” nominasiyasının qalibi Gülağası Mirzəyev və əməkdar artist, “Qızıl dərviş” mükafatı laureatı Mədinə Əliyeva ifa etdilər.
Müvəffəqiyyətlə keçən tamaşada Milli Məclisin deputatları, xarici ölkələrin Bakıdakı səfirliklərinin nümayəndələri iştirak edirdilər.
Bölmənin digər xəbərləri
