QARABAĞ MÜHARİBƏSİ ƏLİLİNƏ FƏRDİ MƏNZİL VERİLMİŞDİR
AZƏRTAC-ın müxbiri xəbər verir ki, smeta dəyəri 40 milyon manatdan çox olan yaşayış evi dövlət vəsaiti hesabına inşa edilmişdir.
Evin açarlarının Qasımovlar ailəsinə təqdim olunması münasibətilə izdihamlı mərasim keçirilmişdir. Rayon icra hakimiyyəti başçısının birinci müavini Niyaz Əliyev, respublika əlillərinin sosial müdafiəsi baş idarəsinin rəisi İbrahim Heydərov, Qarabağ müharibəsi əlilləri, veteranları, şəhid ailələri ictimai birliyi rayon təşkilatının sədri Elşad Hacıyev, Pirəzə kənd ərazi icra nümayəndəsi Elman Əliyev və başqaları yeni mənzil alması münasibətilə ev sahiblərini təbrik edərək, torpaqlarımızın müdafiəsi zamanı şəhid olanlara, onların ailə üzvlərinə, habelə əlillərə göstərilən dövlət qayğısından danışmışlar.
Əlil Yusif Qasımov çıxış edərək, mərasim iştirakçılarına təşəkkür etmiş, əlillərə, şəhid ailələrinə göstərilən qayğı və diqqətə görə dövlətimizin başçısı İlham Əliyevə dərin minnətdarlığını bildirmişdir.
Axırda qonaqlar yaşayış üçün lazımi şəraiti olan otaqlara baxmış, gətirdikləri hədiyyələri Qasımovlar ailəsinə təqdim etmişlər.
