QARAÇAY-ÇƏRKƏZ HÖKUMƏTİ SƏDRİNİN MÜAVİNİ QƏTLƏ YETİRİLMİŞDİR
Hadisə oktyabrın 18-də səhər Çerkessk şəhərinin mərkəzində baş vermişdir. Bir qrup naməlum şəxs Ansar Tebuyevin işə getdiyi “Niva” avtomobilini Kalaşnikov avtomatları ilə deşik-deşik etmişdir. Baş nazirin müavini aldığı yaralardan yerindəcə keçinmiş, sürücüsü isə sağ qalmışdır.
Hazırda lazımi əməliyyat-istintaq tədbirləri görülür, Çerkesskə giriş-çıxış bağlanmışdır.
54 yaşlı Tebuyev Qaraçay-Çərkəz Respublikasının Prezidenti Mustafa Badtıyevin yaxın silahdaşı idi. Hökumətdə güc strukturlarına kuratorluq edirdi. Baş nazirin müavini təyin edilməzdən əvvəl respublika daxili işlər nazirinin birinci müavini olmuş, bundan əvvəl isə kriminal milisin rəisi işləmişdir.
Xatırladaq ki, avqustda Tebuyevə silahlı basqın edilmiş və nəticədə o, ağır yaralanaraq xəstəxanaya düşmüşdü. Onda belə fikir söyləmişdilər ki, bu cinayət xəbərdarlıq xarakteri daşıyır. Maraqlıdır ki, hökumətin oktyabrın 19-na təyin olunmuş fövqəladə iclasında regionda kriminogen vəziyyət müzakirə ediləcəkdi.
Bölmənin digər xəbərləri
