“Qayıdış missiyası: gənclərin həmrəylik və əməkdaşlıq təşəbbüsləri” layihəsi başa çatıb
Bakı, 23 dekabr, AZƏRTAC
Gənclər və İdman Nazirliyinin maliyyə dəstəyi ilə Qayıdış və Dirçəliş Naminə Gənclər Təşkilatının həyata keçirdiyi “Qayıdış missiyası: gənclərin həmrəylik və əməkdaşlıq təşəbbüsləri” layihəsi başa çatıb.
Təşkilatdan AZƏRTAC-a bildirilib ki, layihə Azərbaycan Respublikasının Prezidenti yanında Dövlət İdarəçilik Akademiyasında, Bakı Dövlət Universitetində, Azərbaycan Dillər Universitetində və Bakı Slavyan Universitetində həyata keçirilib. Məqsəd keçmiş məcburi köçkün gənclərin Qarabağa və Şərqi Zəngəzura qayıdışının təşviq edilməsi, işğaldan azad olunmuş rayonlarda daimi məskunlaşmış gənclərin məşğulluğunun artırılması olub.
Gənclər təşkilatının sədri, layihənin koordinatoru Vüqar Qədirov çıxışında Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə rəşadətli Ordumuzun 2020-ci il sentyabrın 27-dən noyabrın 10-dək davam edən 44 günlük Vətən müharibəsində və 2023-cü il sentyabr ayında 1 gündən də az aparılan antiterror tədbirləri nəticəsində Ermənistanı darmadağın edərək kapituliyasiya aktını imzalamağa məcbur etdiyini və Qarabağda dövlət suverenliyini təmin etdiyini, bununla da 200 ildən artıq Azərbaycan torpaqlarında terror-təcavüz siyasəti həyata keçirən düşmənə layiqli yerini göstərdiyini bildirib. O, Qarabağın və Şərqi Zəngəzurun işğaldan azad olunduqdan sonra Böyük Qayıdış Dövlət Proqramına uyğun olaraq yenidən bərpa edildiyini, sürətlə tikinti-quruculuq işlərinin aparıldığını, keçmiş məcburi köçkünlərin öz dədə-baba torpaqlarında mərhələli şəkildə məskunlaşdıqlarını qeyd edib.
V.Qədirov 30 ilə yaxın müddət ərzində öz dədə-baba yurdlarından uzaqda, ölkəmizin müxtəlif bölgələrində məcburi köçkün ailələrində doğulub-böyüyən gənc nəslin, xüsusən gənc ailələrin Qarabağa və Şərqi Zəngəzura qayıdışı prosesində fəal olmalarının, bunun bir vətənpərvərlik və vətəndaşlıq missiyası olduğunu unutmamalarının vacibliyini bildirib: “Uzun illər Azərbaycan torpaqlarını işğal altında saxlayan, həmin ərazilərdə vandalizm hərəkətləri törədən, dədə-baba yurdlarımızda qeyri-qanuni məskunlaşdırma siyasəti aparan Ermənistandan fərqli olaraq bizim öz doğma ocağımıza qayıtmağımız həm düşmənə, həm də ona havadarlıq edən dövlətlərə göz dağı verməklə bərabər, uzun illər pozulmuş hüquqlarımızın bərpası istiqamətində atılan ən müqəddəs addım olan haqqımız və missiyamızdır. Bu sahədə gənclərin, xüsusən təhsilli gənclərin təbliğati işlərə cəlb olunması və təkliflərini vermələri, sosial şəbəkələr vasitəsilə dəstək göstərmələrinin vacib olduğunu heç birimiz unutmamalıyıq”, - deyə V.Qədirov fikirlərini bölüşüb.
Birinci Qarabağ müharibəsinin iştirakçısı, şair, psixoloq Şahin Qədirov çıxışında böyüməkdə olan gənc nəslin vətənpərvərliyi nəticəsində Qarabağa və Şərqi Zəngəzura qayıtmaları üçün dövlətin gördüyü tikinti-quruculuq işlərindən, həmin ərazilərdə daimi məskunlaşan gənclərin yüksək mənəvi-psixoloji durumundan söz açaraq gənclərimizin 44 gün davam edən Vətən müharibəsində olduğu kimi, yurda dönüş missiyasında da vətənpərvərlik nümayiş etdirdiklərini bildirib. Yenidən qurulan Qarabağ və Şərqi Zəngəzurun dirçəldilməsində gənclərin qüvvəsindən səmərəli istifadə etməyin vacib olduğunu qeyd edib.
Gənclər Təşkilatının həyata keçirdiyi layihənin əhəmiyyətindən danışan Turanə Orucova işğaldan azad olunan rayonlarda daimi məskunlaşan keçmiş məcburi köçkünlər arasında bu təbəqənin gənclərinin üzərinə böyük məsuliyyət düşdüyünü, yurda dönüşlə bərabər viran olunmuş yurdlarımızın dirçəldilməsində dəstəklərini göstərmələrinin vacib olduğunu bildirib.
Tədbirlərdə ali təhsil ocaqlarının rəhbərliyinin nümayəndələri, Qarabağdan, Şərqi Zəngəzurdan və Qərbi Azərbaycandan olan tələbələr çıxış ediblər, arzu və təkliflərini bildiriblər.
Bölmənin digər xəbərləri
