Bakı, 6 iyul, AZƏRTAC

Səhiyyə sahəsinin inkişaf etdirilməsi çoxsahəli xarakterə malik Azərbaycan-Yaponiya əlaqələrində əhəmiyyətli yer tutur və son illər bu əməkdaşlıq genişlənir. Yaponiyanın Azərbaycandakı səfirliyinin vasitəsi və dəstəyi ilə səhiyyə müəssisələrinin yenidən qurulmasına dəstək göstərilməsi, yeni texnologiyanın tətbiqi və səhiyyə maarifçiliyinin təşkili istiqamətində tədbirlər həyata keçirilib.

Bu barədə AZƏRTAC-ın müxbirinə TƏBİB-in icraçı direktoru Vüqar Qurbanov “Qazax və Samux rayonlarına təcili tibbi yardım avtomobillərinin verilməsi” layihəsinə münasibət bildirərək deyib.

İcraçı direktor daha sonra qeyd edib ki, 2000-2022-ci illər ərzində Azərbaycanda əhalinin sosial rifahının yaxşılaşdırılması məqsədilə səhiyyə, ictimai sağlamlıq, təhsil və kənd təsərrüfatı sahələrində bilavasitə yerli əhalinin bəhrələnəcəyi layihələrin həyata keçirilməsi üçün “Ot kökləri və İnsan Təhlükəsizliyi Qrant yardımı Proqramı” reallaşdırılıb: “Proqram çərçivəsində Azərbaycanda 58 rayonda 95 tibb müəssisəsinin yenidənqurma və tikinti işləri həyata keçirilib. Həmin layihə xüsusilə əhaliyə ilkin səhiyyə xidmətlərini təqdim edən müəssisələrin yenidənqurma işlərini əhatə edib. TƏBİB tabeliyindəki tibb müəssisələrinin idarə edilməsi, tibbi xidmətlərin təşkili və keyfiyyətinin yüksəldilməsi, müasir tələblərə uyğunlaşdırılması sahəsində görülən işləri təkmilləşdirmək üçün daim əməkdaşlıq etdiyi ölkələrin təcrübəsini öyrənir və tətbiqi imkanlarını araşdırır. Bu məqsədlə Yaponiyanın ölkəmizdəki səfirliyi arasında daha əvvəl görüş keçirərək həmin proqramın səhiyyə sahəsi üzrə planlaşdırılan layihələri müzakirə etmişik. Əməkdaşlıq çərçivəsində görülən işlərin davamı olaraq “Ot kökləri və İnsan Təhlükəsizliyi Qrant yardımı Proqramı” daxilində həyata keçirilən “Qazax və Samux rayonlarına təcili tibbi yardım avtomobillərinin verilməsi” layihəsi yerli əhaliyə göstərilən təcili tibbi yardım xidmətinin yaxşılaşdırılmasının təmin edilməsinə ciddi təkan verəcək”.