Qazaxıstanda AES referendumu: Exit-pollar əhalinin dəstəyini göstərir
Astana, 7 oktyabr, AZƏRTAC
Astanada yerləşən Kompleks Sosial Tədqiqatlar İnstitutu Qazaxıstanda atom elektrik stansiyasının (AES) tikintisi ilə bağlı keçirilən respublika referendumu üzrə aparılan exit-polların nəticələrini dərc edib.
AZƏRTAC-ın Qazaxıstan mediasına istinadla verdiyi məlumata görə, sorğunun nəticələrinə əsasən, səsvermədə iştirak edən vətəndaşların 69,8 faizi AES-in tikintisi layihəsini dəstəkləyib. Sorğuda iştirak edənlərin 30,2 faizi isə əleyhinə səs verib.
Qeyd edilib ki, sorğu respublika üzrə 189 məntəqədə aparılıb. Ümumilikdə 283 519 vətəndaş əhatə olunub ki, bu da əhalinin iradə ifadəsinin ilkin nəticələrini əldə etməyə imkan verib.
AMANAT partiyasının İctimai Siyasət İnstitutu da exit-pollar keçirib.
Bu sorğuda 44 160-dan çox vətəndaş iştirak edib. Tədqiqatın nəticələrinə görə, referendum iştirakçılarının 72,3 faizi Qazaxıstanda AES-in tikintisinə dəstək verib, 27,7 faizi isə razı olmadığını bildirib.
Qazaxıstanda bazar günü AES-in tikintisi ilə bağlı referendum keçirilib. MSK-nın ilkin məlumatlarına görə, Qazaxıstanda referendumda iştirak səviyyəsi 63,87% təşkil edib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
