QAZAXISTANIN SABİQ MƏDƏNİYYƏT NAZİRİ TÜRKSOY-UN BAŞ DİREKTORU SEÇİLMİŞDİR
AZƏRTAC xəbər verir ki, mayın 27-28-də Ankarada Türk Dünyası Mədəniyyət və İncəsənət Ortaq Yönətimi (TÜRKSOY) Daimi Şurasının 24-cü iclası keçirilmişdir.
1994-ci ildən başlayaraq, 12 il ərzində dalbadal 4 dəfə TÜRKSOY-un baş direktoru Azərbaycanın sabiq mədəniyyət naziri, hazırda isə ölkəmizin Rusiyadakı səfiri Polad Bülbüloğlu seçilmişdir. Onun tövsiyəsi ilə Qazaxıstanın keçmiş mədəniyyət naziri Düsen Kaseinov TÜRKSOY-un yeni baş direktoru seçilmişdir.
Düsen Kaseinovu türkdilli ölkələrin mədəniyyət məkanında yaxşı tanıyırlar. O, Qazaxıstan Milli Konservatoriyasına başçılıq etmiş, müxtəlif illərdə mədəniyyət naziri, Mədəniyyət Komitəsinin sədri vəzifələrində işləmiş, son vaxtlar Qazaxıstan Respublikası Prezidentinin xüsusi tapşırıqlar üzrə səfiri olmuşdur. TÜRKSOY-un yeni baş direktoru qurumun fəaliyyəti ilə yaxından tanışdır. O, Daimi Şuranın iclaslarında dəfələrlə iştirak etmişdir, iki iclası isə öz ölkəsində keçirmişdir.
İkigünlük iclasda ümumtürk mədəniyyəti və incəsənətinin müasir vəziyyəti və onun problemləri müzakirə olunmuş, perspektiv planlar nəzərdə tutulmuşdur.
İclasın yekunlarına görə, mətbuat konfransı keçirilmiş və Yekun Bəyannamə imzalanmışdır.
Tədbir iştirakçılarını, o cümlədən Azərbaycanın, Türkiyənin, Qırğızıstanın, Türkmənistanın, Başqırdıstanın, Şimali Kiprin mədəniyyət nazirlərini, Qazaxıstan, Tıva, Xakasiya mədəniyyət nazirlərinin müavinlərini, Tatarıstanın nümayəndəsini Türkiyə Prezidenti Abdullah Gül qəbul etmişdir.
Bölmənin digər xəbərləri
