Qəbələdə Dünya Əməyin Mühafizəsi Gününə həsr olunmuş regional seminar keçirilib
Qəbələ, 21 aprel, Şahnəzər Bəşirov, AZƏRTAC
Respublika Həmkarlar İttifaqı Konfederasiyasının və Azərbaycan Təhsil İşçiləri Azad Həmkarlar İttifaqı Respublika Komitəsinin təşəbbüsü ilə Qəbələdə 28 aprel - Dünya Əməyin Mühafizəsi Gününə həsr olunmuş regional seminar keçirilib.
AZƏRTAC-ın bölgə müxbiri xəbər verir ki, tədbirdə 16 rayonun Təhsil İşçiləri Azad Həmkarlar İttifaqı rayon komitələrinin sədrləri, müəllimlər iştirak ediblər.
Seminarda Azərbaycan Təhsil İşçiləri Azad Həmkarlar İttifaqı Respublika Komitəsinin təşkilat şöbəsinin müdiri Emil Rüstəmov, baş texniki müfəttişi Rəhim Səlimov çıxış edərək bildiriblər ki, Əməyin Mühafizəsi Günü 1987-ci ildən başlayaraq dünyanın əksər ölkələrində qeyd olunur. Bu gün bütün sahələrdə, o cümlədən təhsil sahəsində də əməyin mühafizəsi mühüm məsələ sayılır. Çıxışlarda ümumtəhsil məktəblərində, uşaq bağçalarında və məktəbdənkənar təhsil müəssisələrində əməyin mühafizəsi üçün lazım olan tədbirlər barədə ətraflı məlumat verilib.
Sonra mövzu ilə əlaqədar Təhsil İşçiləri Azad Həmkarlar İttifaqı İsmayıllı, Oğuz, Şəki rayon komitələrinin sədrləri çıxış ediblər. Qəbələ Rayon Təhsil Şöbəsinin müdiri Arifə Bayramova rayonun təhsil müəssisələrində əməyin mühafizəsi sahəsində görülən işlər barədə seminar iştirakçılarına məlumat verib. Qəbələ Rayon İcra Hakimiyyəti başçısının müavini Arif Allahverdiyev məsələnin aktuallığından danışaraq bildirib ki, əməyin təhlükəsizliyi və normal iş şəraitinin yaradılması üçün seminarda qaldırılan məsələlər Qəbələ təhsil müəssisələrində tam həllini tapıb.
Əməyin mühafizəsi ilə əlaqədar keçirilən müsabiqədə qalib gəldiklərinə görə Bərdə, Oğuz, Şəki, Şamaxı, Zərdab, Qəbələ rayon komitələrinin sədrləri Azərbaycan Təhsil İşçiləri Azad Həmkarlar İttifaqı Respublika Komitəsinin fəxri fərmanı ilə təltif ediliblər.
Bölmənin digər xəbərləri
