QƏDİM ŞƏRQ ƏDƏBİYYATI TARİXİNƏ DAİR QİYMƏTLİ DƏRS VƏSAİTİ
Məlum siyasi və ideoloji səbəblər üzündən ali məktəblərimizdə uzun illər Şərq ədəbiyyatının tədris edilmədiyini, hazırda buna böyük ehtiyac oluğunu nəzərə alan Təhsil Nazirliyinin qərarı ilə dərs vəsaiti kimi nəşr edilən bu kitabı mütəxəssislər yüksək qiymətləndirmişlər. Kitab ölkəmizdə Qədim Şərq ədəbiyyatı üzrə ilk ümumiləşdirici əsər kimi ədəbiyyatşünaslığımızın uğuru kimi dəyərləndirilir. Dərslikdə arxeoloji tapıntılardan, təsviri sənət əsərlərindən, dini-mifoloji materiallardan geniş istifadə edən müəllif cəmiyyətdə bədii yaradıcılığın yaranması və inkişaf yolunu izləyir, onun əsas funksiyalarını üzə çıxarır, oxucularına şumer-akkad, Misir, Orta Şərq və Anadolu, İran, yəhudi, hind, Çin ədəbiyyatları haqqında yığcam və maraqlı oçerklər təqdim edir.
Kitabda qədim insanların ibtidai incəsənəti, ilk dini dünyagörüşləri, Qədim Şərq ədəbiyyatına daxil olan qəhrəmanlıq dastanları, lirika, dramaturgiya, şifahi xalq ədəbiyyatının nümunələri və elmlər araşdırılmış, müxtəlif dinlərin kitabları öyrənilərək, onların ədəbi-bədii xarakteri müəyyən edilmiş, dünya ədəbiyyatındakı mövqeyi müəyyənləşdirilmişdir.
Giriş və 10 bölmə və mündəricatdan ibarət bu dərslik ali məktəb tələbələri, bakalavr və magistrlər, aspirantlar, Qədim Şərq mədəniyyəti ilə maraqlanan geniş oxucu kütləsi üçün nəzərdə tutulmuşdur.
Kitabın redaktorları AMEA-nın müxbir üzvü, BDU-nun professoru Vasim Məmmədəliyev və dosent Mirheydər Mirzəyev, rəyçiləri professor Abdulla Abbasov və dosent Ağasən Bədəlzadədir. M.Mirzəyev kitaba “Ulu Şərq, müdrik Şərq” sərlövhəli geniş ön söz əvəzi yazmışdır.
Bölmənin digər xəbərləri
