Qışda istiliklə təminat necə olacaq? - Müvafiq qurumlar mövsümə hazırdır
Bakı, 14 noyabr, AZƏRTAC
Noyabrın 15-dən paytaxt Bakıya və respublikanın rayonlarına istiliyin verilməsinə start veriləcək. Respublikanın 9 dağ rayonunda - Şuşa, Qəbələ, Quba, Qusar, Xaçmaz, Siyəzən, Şabran, Lerik və Şamaxıda isə 34 qazanxana vasitəsilə 1149 mənzilli 34 yaşayış binası, 15 orta məktəb, 3 uşaq bağçası, 2 səhiyyə müəssisəsi, 14 sosial və təsərrüfat hesablı obyekt bu ayın 1-dən “Azəristiliktəchizat” Açıq Səhmdar Cəmiyyətinin istilik mənbələrinə qoşulub.
Bu barədə AZƏRTAC-a məxsusi olaraq “Azəristiliktəchizat” ASC-nin İctimaiyyətlə əlaqələr sektorunun rəisi Elvin Basqallı məlumat verib.
O bildirilib ki, qış rejimi vaxtına keçidlə bağlı hazırlıq işləri həyata keçirilib. Bu işlər çərçivəsində qazanxanalar yoxlanılıb, təmizlənib, oradakı 80 mindən çox avadanlıq saz vəziyyətə gətirilib: “Cəmiyyətin balansında olan min kilometrdən artıq magistral və məhəllədaxili xətlər hidravlik təzyiqlə yoxlanılıb. Harada axıntı, qəza riskləri varsa, aradan qaldırılıb. Cari və ya əsaslı təmir işləri aparılıb, axıntı qeydə alınan xətlər dəyişdirilib. Ötən il 5 qazanxana sökülüb, yerində yenisi tikilib. Bu il isə 7 qazanxana sökülərək yerində yenisi inşa edilib”.
Elvin Basqallı deyib ki, 2025-2026-cı illər payız-qış mövsümü ərzində “Azəristiliktəchizat” ASC-nin Bakı şəhərində və respublikanın regionlarında balansında olan 550 qazanxana və 88 istilik məntəqəsi vasitəsilə 3 min 841 yaşayış binasının, 276 orta məktəbin, 156 uşaq bağçasının, 143 səhiyyə müəssisəsinin və 2 min 786 sosial və təsərrüfat hesablı obyektlərin istilik enerjisi ilə təmin edilməsi nəzərdə tutulub. “İstiliyin qoşulması ilə bağlı müraciətlər var. Qazanxanalar yeniləndiyinə, güc artdığına, müasir tipli olduğuna görə ötən il də bir neçə bina müraciət edib və bu sistemə qoşulub. Fərdi mənzil sahibləri də müraciət edirlər və qoşulurlar. Məqsədimiz abonentlərin sayının çoxaldılması deyil, balansda olan mənzillərin və qeyri-yaşayış obyektlərinin istiliklə təminatında keyfiyyətin artmasına nail olmaqdır”, - deyə o vurğulayıb.
İstiliyin verilməsinin mümkün olmadığı yerlərin qazla təminatı məsələsinə gəlincə, "Azəriqaz" İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev AZƏRTAC-a məxsusi olaraq bildirib ki, ölkəmizdə cari ildə 9 kəndin və 15 yeni yaşayış massivinin qazlaşması tamamlanıb, 12 kənddə və 2 massivdə qazlaşma işi davam edir. Qazlaşdırılmayan yaşayış məntəqələri isə respublikanın müxtəlif bölgələrində 900-ə yaxın kəndi əhatə edir. Bunlardan bir qisminin coğrafi mövqeyinə, ev sayına və qaz təchizatı mənbələrindən uzaq məsafədə yerləşməsinə görə qazlaşdırılması texniki-iqtisadi cəhətdən səmərəsiz kimi qiymətləndirilir. “Azəriqaz" İstehsalat Birliyi maliyyə imkanları çərçivəsində hər il respublikanın müxtəlif bölgələrində müəyyən sayda kənd və massivlərin qazlaşması işlərini davam etdirir. Birlik tərəfindən daşıyıcı və paylayıcı küçə qaz kəmərləri çəkilir ki, bunun nəticəsində əhalinin qaz infrastrukturuna əlçatanlığı təmin edilmiş olur. Paylayıcı küçə qaz xətləri çəkilikdən sonra vətəndaşlar fərdi qaydada "ASAN xidmət" mərkəzlərinə müraciət etməklə öz hesablarına daxili qazlaşmanı həyata keçirirlər. Lakin daha çox sayda kənd və massivlərin qazlaşdırılması üçün əlavə maliyyə resursları tələb olunur”, - deyə o diqqətə çatdırıb.
Qazlaşdırılmamış yaşayış məntəqələrinin və qeyri-yaşayış obyektlərinin odunla təminatı məsələsinə isə Ekologiya və Təbii Sərvətlər Nazirliyindən aydınlıq gətirilib. Nazirliyin Meşələrin İnkişafı Xidmətinin rəisi Ramik Əşrəfov AZƏRTAC-a məxsusi olaraq bildirib ki, Müdafiə Nazirliyinin, Sərhəd və Daxili Qoşunların hərbi hissələrinin, həmçinin təhsil, səhiyyə müəssisələrinin oduna olan tələbatını ödəmək məqsədilə hazırda ölkə üzrə meşə ərazilərinin xüsusi ayrılmış sahələrində odun tədarükü işləri aparılır. Bu barədə məlumatlar nazirliyin rəsmi internet səhifəsində həftəlik olaraq paylaşılır: “Odun tədarükü məqsədilə müəyyən edilən bütün qırma sahələrinin siyahısı avqustun 6-da nazirliyin rəsmi saytında yerləşdirilib. Ayrılmış sahələr barədə ətraflı məlumatla bu linkə keçid edərək tanış olmaq mümkündür”.
Ramik Əşrəfov əlavə edib ki, odun tədarükü Nazirlər Kabinetinin müvafiq qərarı ilə təsdiqlənmiş qaydalar əsasında həyata keçirilir. “Tədarük prosesi əsasən bioloji inkişafdan qalmış, köküstə qurumuş və yanğın təhlükəsi yarada biləcək quru, yıxılmış ağacların hesabına aparılır. Qırmaya aid ağaclar mütəxəssislər tərəfindən müəyyən olunur, nömrələnir və yalnız müvafiq rəy verildikdən sonra onların kəsilməsinə başlanılır. Qeyd edək ki, odun tədarükünə başlamazdan əvvəl regionlarda rayon sakinlərinin və ictimai fəalların iştirakı ilə ictimai dinləmələr keçirilir. Dinləmələrdə odun tədarükünün aparılacağı meşə sahələri barədə məlumat verilir və əhalinin proses barədə məlumatlı olması üçün maarifləndirici izahlar aparılır. Odun əldə etmək istəyən qazlaşdırılmayan kəndlərin sakinləri aidiyyəti üzrə Regional Meşə Təsərrüfatı Mərkəzlərinə müraciət edə bilərlər”, - deyə xidmət rəisi vurğulayıb.
Bölmənin digər xəbərləri
