QIZIL MEDALLI LİSEYİN UĞURLARI

17.04.2006 [22:35]
Çap et
A⁺ A^-

Mingəçevir Azərbaycan-Türkiyə Özəl Liseyində “Bilik” sərgisi keçirilmişdir. Şagirdlər hər iki qardaş respublikanın dövlət himnlərini məharətlə ifa etmişlər. Liseydə təhsil alan şagirdlər ən müasir informasiya texnologiyaları vasitəsilə bilik və bacarıqlarını nümayiş etdirmişlər. 10 şəhər və rayondan gəlmiş təhsil işçiləri, valideynlər sərginin ekspozisiyaları ilə maraqla tanış olmuşlar.

Liseyin müdiri Əhməd Salih Gürən AZƏRTAC-a bildirmişdir ki, 1994-cü ildən fəaliyyətə başlayan bu təhsil ocağının bütün məzunları Azərbaycan və Türkiyə ilə yanaşı, ABŞ, Rusiya, Böyük Britaniya, Rumıniya və digər ölkələrin ali məktəblərinə daxil olmuşlar. Şagirdlər dünya, beynəlxalq, respublika olimpiadalarında 33 qızıl, 45 gümüş, 75 bürünc medal qazanmışlar.

Liseylə tanışlıq, buradakı səliqə-sahman, müasir avadanlıq, kompyuterlərlə təminat tədbir iştirakçılarında xoş təəssürat yaratdı.