ELM VƏ TƏHSİL
Qubadlı rayon təhsil işçilərinin ənənəvi sentyabr konfransı keçirilmişdir
Sumqayıt, 13 sentyabr (AZƏRTAC). Sumqayıtda yerləşən “28 May” mədəniyyət evində Qubadlı rayon təhsil işçilərinin ənənəvi sentyabr konfransı keçirilmişdir.
AZƏRTAC xəbər verir ki, tədbir çərçivəsində rayonun pedaqoji kollektivləri 2011-2012-ci dərs ili ərzində əldə olunan nailiyyətləri sadalamaqla yanaşı, mövcud problemləri də geniş təhlil etmiş, növbəti dərs ilində onların həlli istiqamətində irəliyə doğru atılacaq addımları müəyyənləşdirmişlər.
Konfrans iştirakçıları əvvəlcə foyedə Qubadlı rayon təhsil şöbəsinin uğurlarını əks etdirən stendlə tanış olmuşlar.
Rayon təhsil şöbəsinin müdiri Afət Allahverdiyevanın təqdim etdiyi hesabat xarakterli məruzədə ötən dərs ilinin yekunları bütün istiqamətlər üzrə geniş və ardıcıl təhlil edilmişdir. Səhnədə qurulmuş monitor vasitəsilə hesabatın təqdimatı daha canlı, aydın və maraqla dinlənilmişdir. Tədrisin keyfiyyətinin təmin edilməsi məsələsinə kompleks yanaşılmasından danışan şöbə müdiri fikrini konkret misallar əsasında tamamlamışdır. O, 10 il bundan əvvəl, demək olar ki, heç bir məskunlaşma şəraiti, məktəb inventar və avadanlığı, tədris ləvazimatı olmayan rayon məktəblərinin bugünkü şəraiti ilə konfrans iştirakçılarını nümayiş olunan slaydlar əsasında tanış etmişdir.
Bildirilmişdir ki, son vaxtlar 12 məktəb üçün bina tikilmişdir, Həmçinin 15 məktəbdə əsaslı tikinti və bərpa işləri aparılmış, şəraiti yaxşılaşdırılmışdır. Rayonda fəaliyyət göstərən 31 məktəbin 26 -da müasir istilik sistemi quraşdırılmışdır. Bütün bunlar Prezident İlham Əliyevin “Uşaqlar yaxşı məktəbdə oxumalı, müəllimlər də yaxşı məktəbdə işləməlidirlər” tələbinin real nəticələridir. Qeyd edilmişdir ki, son 5 ildə XI sinfi mərkəzləşdirilmiş imtahan yolu ilə bitirənlərin 98 faizi attestat almışdır. Təhsil sahəsində aparılan məqsədyönlü işlərin nəticəsi özünü ildən-ilə ali və orta ixtisas məktəblərinə qəbulun nəticələrində göstərir. 2011-2012-ci tədris ilində ali məktəblərə qəbul göstəriciləri diaqramlar vasitəsilə konfrans iştirakçılarının diqqətinə çatdırılmışdır. Diqqətə çatdırılmışdır ki, builki məzunların 55 faizi respublikanın ali və orta ixtisas məktəblərinə qəbul olunmuşdur.
Təhlillər göstərir ki, Qubadlı rayon təhsilinin inkişaf səviyyəsi digər məcburi köçkün rayonlarındakı təhsilin inkişaf səviyyəsindən olduqca yüksəkdir. Rayonun məktəblərində təhsil alan şagirdlərin informasiya-kommunikasiya texnologiyalarının imkanlarını hərtərəfli mənimsəmələrini təmin etmək üçün hazırda onların istifadəsində 314 kompyuter (hər 20 şagirdə 1 kompyuter) 9 nootbuk, 13 proyeksiya aparatı vardır. Hazırda 30 məktəbdə kompyuter kabinetləri yaradılmışdır. Çoxlu sayda müxtəlif fənlərdən elektron təlim materialları, eləcə də digər əyani vəsaitlər məktəblərin istifadəsindədir.
Məruzəçi bütün məktəblərin yeni tədris ilinə tam hazır olduğunu tədbir iştirakçılarının nəzərinə çarpdırmışdır.
Konfransda digər çıxış edənlər də ötən dərs ilinin Qubadlı rayonu üçün uğurlu nəticələrindən danışmış, bu nailiyyəti ölkəmizdə aparılan siyasətin məntiqi nəticəsi kimi qiymətləndirmişlər.
Rayon icra hakimiyyətinin başçısı Malik İsaqov Azərbaycanın çağdaş tarixinin nailiyyətlərinin təməlini qoyan ümummilli lider Heydər Əliyevin yaratdığı milli inkişaf strategiyasında təhsil sahəsinə diqqətin prioritet olduğunu çıxışında xüsusilə vurğulamışdır.
İstedadlı insanlar hər bir ölkənin əvəzolunmaz intellektual sərvətidir. Müasir dünyada hər bir ölkənin uğurlu gələcəyi həmin ölkədə təhsilin səviyyəsi ilə müəyyən olunur - deyən RİH başçısı, respublikanın təhsil sistemində davamlı inkişafa yönəlmiş əsaslı infrastruktur dəyişikliklərini, inkişaf yönümlü proqram və layihələrin həyata keçirilməsini dövlətimizin başçısı İlham Əliyevin təhsilə göstərdiyi müntəzəm diqqət və qayğının nəticəsi kimi səciyyələndirmişdir.
O, rayon təhsil işçilərini dövlətimizin başçısının qarşıya qoyduğu vacib məsələ kimi - neft kapitalının insan kapitalına çevirməsinin reallaşması istiqamətində səyləri daha da artıraraq, müasir məktəbin üzərinə düşən əsas vəzifəni -- ailənin, cəmiyyətin və dövlətin maraqlarına uyğun olaraq, zəruri biliklərə, həyati bacarıqlara yiyələnən, əxlaqi-mənəvi dəyərlər zəminində tərbiyə alan vətəndaş yetişdirmək vəzifəsini yüksək keyfiyyətlə yerinə yetirməyə çağırmışdır.
M.İsaqov rayon təhsil işçilərinin ali yığıncağında, həmçinin maraq doğuran bir sıra aktual problemlərin həllinə yönəlmiş məsələlərə toxunmuş, tapşırıq və tövsiyələrini vermişdir.
Konfransda yüksək balla respublikanın ali məktəblərinə daxil olan məzunlar rayon icra hakimiyyəti tərəfindən qiymətli hədiyyələrlə mükafatlandırılmışlar.
Sonda Prezident İlham Əliyevə müraciət qəbul olunmuşdur.