Radar və cərimələr yol təhlükəsizliyinin artırılmasına təsir edirmi?
Bakı, 15 may, AZƏRTAC
Radar və cərimələr yol təhlükəsizliyinin artırılmasına təsir edirmi və yol-nəqliyyat hadisələrinin sayını azaltmaq üçün hansı tədbirlər daha effektivdir?
Nəqliyyat üzrə ekspert Aslan Əsədov AZƏRTAC-a açıqlaması zamanı bildirib ki, yol-nəqliyyat hadisələrinin azalması üçün əsas məqsədlərdən biri daha çox elektron nəzarət sistemlərinin tətbiqidir. Onun sözlərinə görə, bu sistemlər küçələrdə və magistral yollarda hərəkətin düzgün tənzimlənməsinə və qaydalara əməl olunmasına xidmət edir.
“Hər hansı yolda radar quraşdırıldıqda, həmin ərazidə sürücülər adətən sürəti azaldırlar. Lakin radar zonası keçildikdən sonra bəzi sürücülərin yenidən sürəti artırması müşahidə olunur. Buna görə də yalnız radarlarla tam təhlükəsizlik əldə etmək mümkün deyil. Yol-nəqliyyat hadisələrinin qarşısının alınmasında əsas amil insan amilidir. Sürücülər düzgün yol hərəkəti mədəniyyətini mənimsəməli, sürət həddinə əməl etməli, icazə verilməyən yerdə ötmə etməməli və təhlükəli manevrlərdən çəkinməlidirlər. Qayda pozuntuları və real qəza şəraiti bir-biri ilə birbaşa bağlıdır. Ona görə də təhlükəsizliyin təmin olunması yalnız texniki vasitələrlə deyil, həm də sürücülərin məsuliyyətli davranışı ilə mümkündür”, - deyə ekspert qeyd edib.
Bölmənin digər xəbərləri
