RAYON SAKİNİ YAQUT NƏSİBOVANINÇIXIŞI
Bizi möhtəşəm və daha işıqlı gələcəyə aparan rəhbərimiz!
Bu gün biz xaçmazlılar üçün sevindirici və tarixi bir gündür. Qonaqpərvər Xaçmaz torpağı öz sevimli Prezidentini qarşılayır. Sizi qədirbilən xaçmazlılar adından ürəkdən salamlayır, hədsiz minnətdarlığımı bildirir və bir daha rayonumuza “Xoş gəlmisiniz!” deyirik.
Möhtərəm cənab Prezident,
Sizin regionlara səfərləriniz həmişə xeyirxah və xoşniyyətli olur. Hər dəfə Sizin bölgələrə səfərlərinizi izlədikcə, səmimi söhbətlərinizin, qayğıkeşliyinizin şahidi olduqca qəlbimiz sevinc və fərəh hissi ilə döyünür. Bu gün də belədir. Çünki Sizin nəcib və xeyirxah bir işdə, bölgəmizi nura qərq edəcək elektrik stansiyasının açılışında şəxsən iştirak etməyiniz, sevincimizə şərik olmağınız bizə qürur gətirir. Siz öz xeyirxah əməllərinizlə bütün Azərbaycan vətəndaşlarının həyatını işıqlandırırsınız. Ulu öndərimiz, xalqımızın böyük oğlu Heydər Əliyevin qürurla dediyi sözləri xatırlayıram: “Azərbaycan dünyaya bir Günəş kimi doğacaq”. Möhtərəm Prezidentimiz, Günəş yer üzünü öz şəfəqləri ilə nura qərq etdiyi kimi, Siz də xalqımızın rifahı naminə fədakar əməyinizlə elimizi, obamızı, doğma Azərbaycanımızı nurlandırırsınız.
Biz Sizin televiziya vasitəsilə çıxışlarınızın hamısını çox maraqla izləyirik. Bu yaxınlarda qış mövsümünə hazırlıqla əlaqədar keçirdiyiniz müşavirədə aidiyyəti nazirliklərə verdiyiniz ciddi tapşırıqlar xalqımız tərəfindən əhalimzə göstərilən qayğı kimi qiymətləndirilir. Bizə bəxş etdiyiniz bu nur bütün mənalı ömrünü öz xalqının xoşbəxtliyi üçün yaşamış ümummilli liderimizin işıqlı ideyalarına sədaqətinizin nümunəsidir. O dahi insan məhz bu günü görərək, qəti əmin idi ki, qurduğu dövlət, əsasını qoyduğu siyasət etibarlı əllərdə Azərbaycanı daha işıqlı gələcəyə aparacaqdır.
Bu gün Xaçmaz rayonu da Sizin diqqət və qayğınız sayəsində sürətli inkişaf dövrünü yaşayır. Rayonumuza ötən səfərinizdən keçən dövr ərzində şəhərlərimiz, qəsəbə və kəndlərimiz böyüyüb gözəlləşmiş, yeni iş yerləri açılmış, istirahət parkları, muzeylər yaradılmış, abidələr ucaldılmış, küçələr işıqlandırılmış, yollar və binalar müasir tələblərə uyğun təmir olunmuşdur. Xaçmazlılar bütün bunlara görə Sizə öz dərin minnətdarlıqlarını bildirirlər.
Əziz Prezidentimiz,
Açılışına toplaşdığımız bu nəhəng elektrik stansiyasını bölgəmizə bəxş etdiyinizə görə çox sağ olun. Bizə göstərdiyiniz diqqət və qayğıya görə çox sağ olun. Bugünkü sevincimizə şərik olduğunuza görə çox sağ olun.
Möhtərəm cənab Prezident,
Qədim və zəngin tarixə malik Azərbaycan xalqı Sizin kimi parlaq düha, dövlət xadimi ilə fəxr edir. Çünki Siz xalqımızın milli qüruru, müasir dövlətçiliyimizin banisi, dünyanın ən qüdrətli liderlərindən olan ulu öndərimiz Heydər Əliyev ocağının layiqli varisi, onun xeyirxah ideyalarının davamçısısınız. Biz xaçmazlılar xoşbəxtik ki, xalqımızın əzəli və əbədi lideri Xaçmazı və xaçmazlıların əməyini daim yüksək qiymətləndirmiş və hələ 1981-ci ildə rayonumuzda olarkən “Xaçmaz Azərbaycanın ən gözəl guşələrindən biridir. Buranın təbiəti də gözəldir, insanları da qəhrəmandır, fədakardırlar”, - demişdir. Biz xaçmazlılar bu qiyməti heç vaxt unutmayacağıq.
Möhtərəm cənab Prezident,
Vətənimiz kənd-kənd, oba-oba dəyişir və abadlaşır. Bu, bölgələrin, ucqar dağ kəndlərinin yeniləşən, abadlaşan mənzərəsində daha aydın görünür. Biz qadınları isə Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı hörmətli Mehriban xanımın gördüyü işlər çox sevindirir. Milli-mədəni irsimizin qorunması, muğamlarımızın təbliği, xüsusilə də təhsilimizin inkişafına göstərdiyi diqqətə görə analarımız adından ona çox sağ olun deyir, cansağlığı, bu nəcib və xeyirxah işlərində yeni-yeni uğurlar arzulayıram.
Möhtərəm cənab Prezidentimiz,
Biz xoşbəxtik, ona görə ki, Heydər Əliyevin qurduğu müstəqil Azərbaycan Respublikasının vətəndaşıyıq. Biz xoşbəxtik, ona görə ki, işıqlı və xoş gələcəyimizin açarı, Azərbaycan dövlətinin sükanı Sizin güclü əllərinizdədir. Bütün dünya azərbaycanlıları haqlı olaraq Sizinlə fəxr edirlər. Bu əlamətdar günü bizə bəxş etdiyinizə görə hədsiz minnətdarlığımızı bildirir, Sizə cansağlığı, respublikamızın tərəqqisi, daha da zəngin bir ölkəyə çevrilməsi naminə fəaliyyətinizdə yeni-yeni uğurlar arzulayırıq.
Ulu Tanrı Sizi qorusun, əziz Prezidentimiz!
X X X
Prezident İlham Əliyev mərasimdə nitq söylədi.
X X X
Sonra Azərbaycan Prezidenti elektrik stansiyasının istifadəyə verilməsindən xatirə olaraq qoyulmuş daş lövhəyə baxdı. Daşın üzərində “Xaçmaz elektrik stansiyası Azərbaycan Respublikasının Prezidenti İlham Əliyev tərəfindən işə qoşulmuşdur7 dekabr 2006-cı il.”
sözləri yazılmışdır.
Dövlətimizin başçısı daşın önündə xatirə şəkli çəkdirdi.
Bölmənin digər xəbərləri
