RESPUBLİKA SARAYINDA...
“ULDUZLU GECƏ” OLACAQ
Qadınlar bayramı münasibətilə martın 8-də Respublika sarayında gözəl melodiyalar müəllifi, isti nəğmələrinin qanadlarında ürəklərdən-ürəklərə pərvazlanmış istedadlı bəstəkar Nadir Əzimov “Ulduzlu gecə” adlı konsert proqramı ilə sənətsevərlərin görüşünə gələcəkdir.
Respublika sarayından AZƏRTAC-ın müxbirinə demişlər ki, qadınlara bayram töhfəsi kimi təqdim ediləcək və orijinal ssenari əsasında qurulacaq musiqili gecədə bəstəkarın nəğməkar qəlbindən süzülərək dinləyiciləri ovsunlayan, mayası xalqımızın nikbin ruhundan və milli musiqimizdən yoğrulmuş yaradıcılıq nümunələri ifa olunacaqdır.
“Ulduzlu gecə”nin qoynunda qanadlanan lirik və həzin melodiyaları “Büsat” ansamblının və estrada qrupunun müşayiəti ilə respublikanın əməkdar artistləri Ağadadaş Ağayev, Zülfiyyə Xanbabayeva, Zaur Rzayev, Mübariz Tağıyev, Bilal Əliyev, mügənni Könül Kərimova, Eyyub Yaqubov, ümumiyyətlə on beş ən populyar musiqi ifaçısı oxuyacaqdır. Bəstəkarın özü də sintizatoru ilə müşayiətçilərin arasında çıxış edəcəkdir. Konsertdə, eyni zamanda, Nadir Əzimovun hələ ifa edilməmiş yeni mahnıları da səslənəcəkdir.
Bölmənin digər xəbərləri
