MƏDƏNİYYƏT
“RİQOLLETO”... BAKIDA
Azərbaycan Dövlət Akademik Opera və Balet Teatrından bildirmişlər ki, dünyanın və Avropanın bir sıra opera və balet ustalarının Bakıya dəvət olunması bu mövsümdə də davam etdiriləcəkdir. Məsələn, Avstriya, Ukrayna, Gürcüstan və Azərbaycan opera sənəti ulduzlarının iştirakı ilə C.Verdinin “Riqolleto” operası səhnəmizdə göstərilərkən orkestri Vyana Operasının dirijoru xanım Kornelya von Kerssenbrofk idarə edəcəkdir.
Operada Riqolleto rolunda Ukraynanın əməkdar artisti, vokalçıların Beynəlxalq müsabiqəsi laureatı Vladimir Openko çıxış edəcəkdir.
Operasevərlər Hersoq rolunda Gürcüstanın xalq artisti, Dövlət mükafatı laureatı, vokalçıların Beynəlxalq müsabiqələrinin laureatı Teymuraz Ququşvilini görəcəklər. Cilda partiyasını Ukrayna Dövlət Akademik Opera və Balet Teatrının solisti, Ukraynanın xalq artisti, vokalçıların Beynəlxalq müsabiqəsinin laureatı Olqa Naqornaya ifa edəcəkdir.
Tamaşada, eyni zamanda, milli operamızın gənc və istedadlı sənətçiləri - əməkdar artistlər, respublika Prezidentinin mükafatçıları Əli Əsgərov və Əkrəm Poladov da oynayacaqlar.
“Riqolleto” operası oktyabrın 25-də tamaşaya qoyulacaqdır.