ROMADA XV ƏSR SƏNƏT İNCİLƏRİ SƏRGİSİ AÇILMIŞDIR
AZƏRTAC xarici kütləvi informasiya vasitələrinə istinadla xəbər verir ki, İtaliya paytaxtının mərkəzindəki Via del Korso küçəsində yerləşən muzey sarayında “Roma XV əsrdə: incəsənətin çiçəklənməsi - Donatellodan Perucinoya qədər” adlı bədii sərgi açılmışdır. Sərgidə nümayiş etdirilən 170-dən çox eksponat - ikonalar, rəsm əsərləri, heykəltəraşlıq nümunələri, sikkələr, əlyazmalar və mebel buraya gələn tamaşaçıların gözləri qarşısında Əbədi şəhərin əfsanəvi intibahı dövrünə aid interyerləri canlandırır.
Papanın iqamətgahının yerləşdiyi bu gözəl paytaxt şəhəri böyük rəssamların səyləri sayəsində Roma imperatorlarının dövrünə xas olan zənginliyini özünə qaytarırdı. Sərgidə nümayiş etdirilən Donatello, Mantenyi, Pyero della Françeska, Filippo Lipi, Pintorikkyo, Perucino və digər məşhur sənətkarların yaradıcılığının ən yaxşı nümunələri buna sübutdur.
Beş xronoloji və tematik bölmədən ibarət olan ekspozisiya orta əsrlərdə İtaliyanın müxtəlif şəhərlərindən Romaya gəlmiş böyük sənətkarların yaradıcılığının əsas mərhələlərini izləməyə imkan verir. Buradakı işlərin çoxu hədsiz kövrək olduqlarına görə, bərpaçılar tərəfindən uzun müddət sərgiyə hazırlanmışdır. Sərginin təşkilatçıları burada dünya şöhrətli sənət inciləri ilə yanaşı, Antoniattso Romano və ya Pyermetteo d’Ameliya kimi nisbətən az tanınmış müəlliflərin əsərlərinə də yer tapmışlar. Marşrut sonralar - Maarifçilik dövründə Romanın ən tanınmış sənətkarlarından biri olmuş Mikelancelo Buonarrotinin yaradıcılığının erkən dövrünə aid bir rəsm əsəri ilə başa çatır.
