Hörmətli xanım Mehriban Əliyeva,

Əziz qonaqlar!

Burada – Rumıniyada Azərbaycan Respublikasının Prezidenti zati-aliləri cənab İlham Əliyevi, onun hörmətli xanımı Mehriban Əliyevanı və Rumıniya ilə bütün sahələrdə dostluq və əməkdaşlıq münasibətlərini inkişaf etdirmiş Azərbaycan Respublikasının nümayəndə heyətinin bütün digər üzvlərini böyük məmnuniyyətlə salamlayıram.

Bir daha hamınız dost ölkəyə xoş gəlmisiniz. Mənim fikrimcə, Azərbaycan özünü müstəqil dövlət elan etdikdən sonra ölkələrimiz arasında münasibətlərin bu cür uğurla inkişaf etdirilməsinə əvəzsiz töhfələr vermiş böyük dövlət xadimi, vəfatına həddindən artıq kədərləndiyimiz Heydər Əliyevin rolunu xatırlamağın əsil yeri və vaxtıdır.

Hörmətli cənab Prezident, xanımlar və cənablar!

İkitərəfli münasibətlərimizin keçdiyi yola nəzər salarkən mən belə qənaətə gəlirəm ki, bizim ölkələrimiz nisbətən qısa zaman kəsiyində uzunmüddətli dostluq və əməkdaşlığın həm təməlini qoymuş, həm də bu dostluq və əməkdaşlığı möhkəmləndirə bilmişlər.

Siyasi sahədə birlikdə səmərəli işləyərək, birgə səylərlə ikitərəfli hüquqi baza yaratmışıq. Biz istəyirik ki, XXI əsrin tələblərinə cavab verə bilməkdən ötrü bu hüquqi bazanı daha da inkişaf etdirək.

Mən Azərbaycan Respublikasına 2002-ci ildəki rəsmi səfərimi böyük məmnuniyyətlə xatırlayıram. O zaman Prezident Heydər Əliyevlə apardığımız müzakirələr vaxtı siyasi və iqtisadi sahədə ikitərəfli əməkdaşlığı sürətləndirmək iradəmiz aydın oldu. Cənab Prezident İlham Əliyev, Sizin burada, Buxarestdə olmağınız Azərbaycanın xarici siyasətinin davam etdirilməsinə, xüsusilə də Rumıniya ilə münasibətləri inkişaf etdirmək istəyinə dəlalətdir.

Keçən müddət ərzində ikitərəfli münasibətlərimizin inkişaf dinamikası bizə əlaqələrimizin gələcəyi ilə bağlı nikbin olmağa haqq verir.

Bizim əsas məqsədimiz siyasi sahədə olduğu kimi, ticarət dövriyyəsi və iqtisadi əməkdaşlıq sahəsində də eyni əla nəticələrə nail olmaqdır. Mən qəti inanıram ki, Sizin Rumıniyaya səfərinizin nəticələri və bizim danışıqlarımız ikitərəfli iqtisadi əməkdaşlığımıza, ticarət əlaqələrinə də təkan verəcəkdir.

Biz azərbaycanlı biznesmenlərin Rumıniyada çalışmasını arzulayır və təşviq edirik. Eyni zamanda, Rumıniyanın biznes dairələrinə tövsiyə edirik ki, Azərbaycanın iqtisadi bazarını gələcəkdə mümkün hədəf kimi nəzərdə tutsunlar. İş adamlarının fəaliyyətini sürətləndirmək məqsədi ilə biz ümumi siyasi səylər vasitəsilə müvafiq hüquqi baza və lazımi infrastruktur yaratmağa hazırıq ki, bu da ölkələrimiz arasındakı coğrafi məsafəni qısaldar. Bu sahədəki marağımızın aydın ifadəsi kimi istərdim ki, ölkələrimiz arasındakı nəqliyyat marşrutlarının inkişaf etdirilməsi ilə bağlı səyləri qeyd edim.

Bununla biz müstəqil təşəbbüsün inkişaf edə biləcəyi bazanı təmin edirik. Məqsədimiz özəl şirkətlər arasındakı əməkdaşlıqdan başlayaraq, ölkələrimiz üçün qarşılıqlı maraq kəsb edən yeni layihələrədək bütün mühüm sahələrdə demokratik şəraitdə, azad bazar iqtisadiyyatı qanunlarına uyğun şəkildə əməkdaşlıq etməkdir.

Mən qəti inanıram ki, Rumıniya-Azərbaycan Hökumətlərarası birgə iqtisadi komissiyasının bir neçə gün əvvəl keçirilən ilk iclası bizim iqtisadi əlaqələrimizin yeni meyarlarla ölçülməsinə təkan verəcəkdir. Keçid dövründən azad bazar iqtisadiyyatınadək olan prosesin təcrübəsindən istifadə edərək, rumıniyalı biznesmenlər azərbaycanlı tərəfdaşları ilə birgə Azərbaycan Respublikasının milli maraqlarına cavab verən məqsədlərə nail olmaq işinə mühüm töhfə verə bilərlər. Bu məqsədlərə bu günlərdə ölkəmizdə həyata keçirilən İqtisadi və sosial inkişaf proqramı da daxildir.

Cənab Prezident, əziz dostlar, Rumıniya Azərbaycan Respublikasının Avropa və Avratlantik strukturlarına sadiqliyini və yaxınlaşma səylərini diqqətlə müşahidə edir və bu səylərə hörmət bəsləyir. Biz həm də Azərbaycan Respublikasının beynəlxalq antiterror əməliyyatlarındakı fəal iştirakına və “Sülh naminə tərəfdaşlıq” proqramı çərçivəsindəki fəaliyyətinə hörmətlə yanaşırıq. Azərbaycan hərbçilərinin dünyanın Kosovo, Əfqanıstan və İraq kimi qaynar nöqtələrindəki sülhməramlı əməliyyatlarında iştirakına rəğbətimizi bildiririk.

Avropa və Avratlantik strukturlarına inteqrasiya çətin bir prosesdir və Rumıniya onu tamamlamaq üzrədir. Rumıniya artıq NATO-nun üzvüdür və bununla biz bugünkü əzablı dünyada həddindən artıq qorxulu, gözlənilməz hallardan təhlükəsizlik sipəri ilə təmin olunuruq. Yaxın gələcəkdə, yəqin ki, 2007-ci ildə Rumıniya Avropa Birliyinin də tamhüquqlu üzvü olacaqdır.

Vaxtilə Prezident Heydər Əliyev Azərbaycan Respublikasının müstəqilliyinin 10 illiyinə həsr olunmuş nitqini əsil böyük dövlət xadimi kimi tamamlayaraq demişdir. Mən həmin nitqdən sitatı olduğu kimi gətirirəm: “İqtisadiyyatın sürətli inkişafını təmin etmək, ölkədə işsizliyi azaltmaq, əhalinin rifahını yüksəltmək Azərbaycan iqtisadiyyatının dünya iqtisadiyyatına inteqrasiyasına doğru atılacaq vacib addımlardır”. O, sadəcə olaraq, öz ölkəsinin xarici siyasət məqsədini bir daha təsdiq edirdi ki, bu məqsəd də dünya iqtisadiyyatına inteqrasiyadır.

Rumıniya dost Azərbaycanla birgə işləməyə, təcrübəsini bölməyə hazırdır ki, ən qısa müddətdə və ən az xərclərlə inteqrasiya prosesinin bütün fazaları əhatə olunsun.

Rumıniya BMT, Avropa Şurası və Qara Dəniz İqtisadi Əməkdaşlıq Təşkilatı kimi beynəlxalq təşkilatlar çərçivəsində Azərbaycan Respublikası ilə əməkdaşlığı yüksək qiymətləndirir. Biz hesab edirik ki, Rumıniya və Azərbaycan birlikdə fəaliyyət göstərərək, Şərq-Qərb nəqliyyat dəhlizindəki strateji-coğrafi mövqelərindən daha yaxşı istifadə edə, Qara dəniz hövzəsi regionunda daha mühüm rol oynaya bilərlər.

Rumıniya Cənubi Qafqazdakı və bütün MDB məkanındakı hadisələrə böyük diqqət yetirir və əmin olduğunu bildirir ki, beynəlxalq ictimaiyyətin davamlı səyləri vasitəsilə bu region tədricən sabitlik və iqtisadi əməkdaşlıq məkanına çevriləcəkdir. Biz Dağlıq Qarabağ münaqişəsinin sülh yolu ilə həll olunmasını dəstəkləyirik. Belə bir həll yalnız Azərbaycan Respublikasının ərazi bütövlüyünə hörmət əsasında tapıla bilər. Rumıniya tərəflərin münaqişəni həll etmək üçün razılığa gəldiyi hər hansı bir həlli dəstəkləməyə hazırdır.

Rumıniya və Azərbaycan Respublikası birlikdə fəaliyyət göstərərək, beynəlxalq aləmin məsuliyyətli üzvləri kimi, digər demokratik ölkələrlə birgə sülh və sabitlik prinsiplərini irəli çəkə bilər, əsaslı töhfələri vasitəsilə həm öz xalqlarının, həm də gələcək nəsillərin maraqları naminə münaqişə zonalarına sülh gətirərlər.

Ölkələrimiz heç bir anlaşılmazlıq olmadan aralarındakı dostluğu möhkəmləndirərək sülh, sabitlik və firavanlıq naminə fəaliyyət göstərəcəklər.

Bu fikirlərlə mən zati-alinizin şərəfinə, Rumıniya və Azərbaycan arasındakı dostluğun möhkəmlənməsi şərəfinə, xalqlarımıza daha yaxşı və təhlükəsiz gələcək şərəfinə, Sizin və hörmətli xanımınızın şərəfinə badə qaldırıram.